Gott hat keinen Plan für dein Leben

Predigttext «Gott het kei Plan für di Läbe». Zielwert: max. 1800 Wörter.

Ich würd mit euch hütte gärn überd Froog schwätze, eb Gotte Plan für unser Läbe het.

Mir Mensche mache uns doch für vieli Sache e Plan. Ich ha zum Bispiil mit guete Fründe vor e paar Joor ind Ferie welle. Es isch nonig ganz konkret gsi, abr mir hänn eigentlich in Norde uffe welle, also vor allem die andere. Ich wär lieber ans Meer… Wäge Corona isch aber das ganze denn ins Wasser gfalle, und mir hänn miesse umplane! Schlussändlich simmr denne nach Kroatie in e wunderschöns kleins Hüüsli diräkt am Meer. Viel meh hänn mir abr au dörte nid plant kha. Mir hänn eifach in Tag ine gläbt und hänn gmacht, uff was mr grad Luscht kha hänn.

Es wär au ganz anderscht gange: Mir hätte die ganzi Wuche genau könnte duuretakte: Am Mäntig an dä Strand, zum zMittag genau das ässe, denn das Spiel spiele, am Oobe in genau das Restaurant. Zischtig: 7ni uffstoh, denn in dä Nationalpark, zoobe wird das kocht und denn dr Film XY gluegt. Und so wiiter…

Wenn mir saage, «Gott het e guete Plan für mi Läbe», denn überlegge mir uns nur so halb, was mir drmit meine. Ich glaub, dä Gedanke het öbbis sehr tröstlichs, wenns uns nid so guet goht. Wenn mir unde dure mien. Denn könne mir uns dra feschtheebe, dases widr besser wird, dass Gott scho luege wird, dass mir ussem Schlamassel widr ussekömme. Und das isch au nid falsch, Gott will wirklich, dasses mit unsere Läbe widr bärguff goht.

Aber jetzt stelled euch mol vor, Gott plant mi Läbe eso, wie ich mini Ferie plane könnt:

Also, mit 18 macht dr Fabian Matur. Denn e Joor Australie, denne studiere. 2020 denn Abschluss Nochär no e Bachelor – Abschluss 2029. 2023 lerntr e Frau kenne (jä, ich ha no Hoffnig!), 2025 hüroote, etc.

Das tönt jo alles nid so schlächt. Aber es gibt zwei grossi Problem drbi: Erschtens, was machich denn mit mim Läbe? Wo dörf ich mitbestimme? Binich eifach zwunge, mi Läbe wie uff Schiene zfahre? Bestimmt Gott eifach übr mi?

Und die viel grösseri Froog, wo du dir vilicht au scho gstellt hesch: Was isch, wennich dä Plan mol verpass? Wennich ab de Schiene groot und mol falsch abbieg? Hani denn eifach Päch kha?

Nämmemr mol ah, Gott het sone klare Plan, und im däm Plan stoht dinne, das isch am Zischtig imne Monet mini Traumfrau imne Kaffi kennelern. Tönt doch nid so schlächt. Aber was passiert, wenn ich an däm Zischtig grad schlächt druff bi, und anstatt si eifach nur mi Handy aalueg? Mir sage nid hallo, si goht wider, zack, Chance vorbei. Verbii am göttliche Plan. Und plötzlich isch die Vorstellig vomne guete Plan vo Gott doch nümm do tröstend, sondern eher beängstigend.

Ich glaub nid, dass Gott eso funktioniert, und das uss zwei Gründ: Erschtens glaubich nid, dass Gott will eso funktioniere! Klar, Gott könnti total über uns bestimme, jedi Sekunde vo unserem Läbe und jedes Atom im Universum beiiflusse. Gott isch allmächtig, verstönd mi nid falsch, är könnti das, aber ich glaub nid, dass ärs will! Ich glaub, är will mit uns zämme unser Läbe gstalte, und är will e ächti Beziehig zu uns, uns das goht nur, wenn mir meh sinn als sini Marionette in sim Puppespiel, eifach nur Schauspieler imne Film, wo Gott in sim göttliche Bluray-Player abspielt.

Und zweitens glaubich nid, dass Gott eso funktioniert, will mir in dr Biible immer wieder drvo lääse. Ich möchte mit euch hütte e biblischi Gschicht aaluege, womir gsehn, dass Gott sini Gschicht mit uns nid eifach über unseri Köpf hinwäg, sondern mit uns schribt!

Es isch dGschicht vom Prophet Samuel und em Volk Israel.

Dr Samuel isch vo Gott beruefe, zum uff Gottes Stimm zloose und das, wonär ghört, em Volk wiiterzgäh. Dr Samuel isch abr alt worde, und het sini Söhn welle iisetze, dass sii dMensche könne fiere:

»Samuel«, sagten sie, »du bist zu alt geworden, um das Volk noch richtig führen zu können, und deine Söhne folgen nicht deinem Vorbild. So setz doch einen König als Herrscher über uns ein, wie auch alle unsere Nachbarvölker einen haben.« (1. Sam. 8,5)

Tönt anversich nid so unvernünftig. Das isches abr nid gsi. Spezielle am Volk Israel isch ebbe gsi, dass si kei König kha hänn, sondern dass Gott ihre König gsi isch! Eigentlich sage si Gott do: Mir wänn lieber vomne König als vo dir gfiert wärde. Dr Samuel findet das gar nid cool, und är redet mit Gott, und Gott seit ihm:

»Gib ihnen, was sie wollen! Mit ihrer Forderung lehnen sie ja nicht dich ab, sondern mich. Sie wollen mich nicht mehr als ihren König anerkennen.» (1. Sam. 8,6)

Gott kennt sis Volk. Är isch nidmol bsunders überrascht – Im Satz nochär seit Gott wortwörtlich «es isch immer sgliche mit ihne» - abr trotzdäm isch är bitter enttüscht. Es isch e persönlichi Zruggwiisig, wo Gott sälber trifft. Aber was passiert jetzte? Gott seit öbbis ussergwöhnlichs: «Gib ihnen, was sie wollen! Erfülle ihre Forderung!»

Obwohl Gott ussdrücklich NID will, dass Israel e König kriegt, goht Gott uff ihri Forderig ih! Gottes Plan A isch eigentlich gsi, dass Israel ihn sälber als König het. Dä isch schomol gschiiteret. Abr Gott isch scho mit Plan B in de Startlöcher: «Ich habe euch damals aus Ägypten herausgeführt und euch von den Ägyptern und von allen anderen Feinden befreit, die euch in die Enge trieben. Ich, euer Gott, habe euch seither immer wieder aus euren Nöten und Bedrängnissen herausgeholfen, und doch lehnt ihr nun meine Führung ab und verlangt, dass ich einen König über euch einsetzen soll. Gut, ihr sollt bekommen, was ihr wollt!» (1. Sam. 18-19)

Ihr merket, wie Gott das eigentlich nid super findet. Abr well är unbedingt e Beziehig mit de Mensche ha will, lost är sich uff das Experimänt König ih! Är hilft ihne sogar, e guete König zfinde! Gott suecht also dr Saul uss. Und so goht dGschicht wiiter, mitem Saul als König.

Details erspar ich euch jetzte, aber wie vieli vo euch vilicht wüsse: Dr Saul isch e miese König gsi. Är widersetzt sich immer wieder Gottes Aawiesige und isch eifach e schlächte Aafierer. Dr Samuel, unterdesse im Pension, vilicht mit Huus am See odr sogar am Meer, muess zruggkho und dr Saul zur Red stelle: «Was hast du getan? … Das war sehr dumm von dir! Du hast dem Befehl des HERRN, deines Gottes, nicht gehorcht. Er wollte dir und deinen Nachkommen für alle Zeiten die Königsherrschaft über Israel geben. Du aber hast sie durch dein voreiliges Handeln verspielt.»

Und denn seit Gott übbis bewunderswärts: »Ich bereue es, dass ich Saul zum König gemacht habe». Got bereuts! Wenn Gott e klare Plan hätt, wie könnt är denn sie eigene, perfekte, göttliche Plan bereue?

Dr Samuel isch fascht am verzwiifle. Scho wider e Enttüschig. Scho wider hets nid klappt. Sogar dr Backup-Plan vo Gott isch voll ind Hoose. Gott wär sogar bereit gsi, em Saul und sine Söhn uff alli Ewigkeit sKönigtum zgäh, und dr Saul het fett nid performt. Isch das jetzt sÄndi vo dr Gschicht vo Gott und sim Volk, frogt sich dr Samuel? Abr Gott sind d'Idee nonig ussgange. Är seit zum Samuel: »Wie lange willst du noch um Saul trauern? … Nimm dein Horn, füll es mit Öl und mach dich auf den Weg nach Bethlehem. Dort such Isai auf, denn ich habe einen seiner Söhne zum neuen König auserwählt.«

Während dr Samuel no dSchärbe vom alte Plan am zämmekratze isch, isch Gott scho drah, Plan C usszfiere. Är isch scho drah, dr nägschti König zsueche. Ihr kenned dä vilicht: Es isch dr David. Und denne foht dGschicht mit Gott mitem David ah. Ich verzell euch jetzt nid wiiter, abr ihr wüssed vilicht, au dr David isch nid perfekt gsi. Au mit ihm isch nid alles guet gloffe.

Aber ich ha euch welle zeige, wie viel Handligsspiilruum Gott uns Mensche losst. Wie kreativ und liebevoll är mit unsere Fähler und unserem Versage umgoht, und wie är uns au wirklich zuetraut, sälber Entscheidige zträffe, und das au respektiert!

Ich würd euch gärn zum Abschluss no e Bispiil mache. Wär vo euch het als Kid mit Legos odr Duplos gspiilt? Ich ha das friener sehr gärn gmacht.

Stelled euch vor, e Vater spielt mit sim Sohn Lego.

Dr Sohn dänkt sich: Mi Läbe, das will ich scho uff dr Überholspur läbe, ich bau mir e superschnälls Auto! Also baue si zämme, und baue, und irgendwenn mertk dr Sohn: Boah, das isch jo e schäbigs Auti. Ich glaub nid das das klappt. Und in däm Momänt seit si Vater zu ihm: Jo, e super Auto wird’s vilicht nid, aber es gseht doch fascht scho uss wiene Schiff! Guet, das isch au e guete Alternativplan, dänkt sich dr Sohn, und si baue zämme wiiter. Doch nachme Ziitli merktr au do: Sorry, e Schiff wird das nid. Dr Papi blibt wiiterhin kreativ und bemieht sich: Ganz ehrlich, meinsch nid, do könntemr e super Ruumschiff druss baue? Und so baue si wiiter, bis es e Ruumschiff wird!

Ich glaub, vieli Christe stelle sichs Läbe mit Gott wiene Lego-Bausatz nach Aaleitig vor: E Schachtle mit 5527 Teili, und e fixe Plan drbi, wieme jedes einzelne zämmebaut. Jedes Teili muess genau dört ahne, wos aaneghört, dass drbi öbis guets uusekunnt.

Ich glaub aber, dass dGschicht vo Gott und de Mensche, vo Gott und dir, viel eher isch wie das Bispiil vom Vater, wo mit sim Sohn zämme öbbis baut. Das isch unglaublich befreiend, denn vilicht weisch du: Wenns nur ei Bauaaleitig gäbti, nur ei richtige Wäg, zum die Sach zämmezsetze, denn hättich das scho längschtens verpasst. Du merksch vilicht, du hesch Fähler in dim Läbe gmacht. Du hesch brutal Sache in Sand gsetzt und Lüüt enttüscht.

Odr vilicht hesch du viel Zerbruch oder Hass erfahre und hesch wies Gfühl: Ich ha numme verkehrti Teili in minere Schachtle kha! Ich ha die jo gar nid richtig könne zämmesetze….

Wenns dir so goht, denn heb kei Angscht: Mir dörfe sicher sii, dass Gott no nid fertig isch mit uns! Är het di nonig uffgäh! Är het e Zuekunft für di, wo är mit dir baut, und är isch dir immer mindeschtens ei gueti Idee voruss!

Ich bi überzügt: Wenn di Läbe nid lauft, denn bringts Gott zum fahre. Und wenns nid fahrt, denn bringt ärs zum schwimme! Und wennrs nid zum schwimme bringt, denn bringt ärs zum fliege!