Wie Gott sich den Menschen zuwendet (die Geschichte von Zachäus)

Unsere Schauplatz isch hütte dStadt Jericho. Scho im Alte Testamänt kunnt si immer wieder vor. Dört isch si vor allem für ihri digge Muure bekannt. Zu dr Ziit vo Jesus isch Jericho e blühendi Gegend, dr Name bedüütet wörtlich “Duftort”: sehr fruchtbar, vieli Planze, und dank em Balsamhandel au wirtschaftlich bedütsam und rich. Dr produzierti Balsam isch vo Rom uss hoch bestüürt worde - und für das het Rom Zöllner brucht, zum die Zöll iiztribe. Die Zollstelle sin jewiils verpachtet worde, und dZöllner hänn si denn sälbstständig könne verwalte.

Die jüdische Iiwohner hänn das System ghasst - dRömer, dSoldate und die Beamte. Abr am meiste verhasst sin dZöllner gsi. Si sinn Volksverröter gsi, imne politische und imne religiöse sinn. Si hänn mitem Fiind, mit de Besatzer kollaboriert. Nid well si hänn miesse, sondern well si hänn welle. Und si sinn no riich worde drbi.

Eine vo dene Zöllner isch dr Zachäus gsi. Und mir wüsse nid genau wieso, abr uss irgend emne Grund will är dä Jesus gseh, wo in dr Stadt isch. Wohrschins hetr vo däm Wanderprediger, sone Jünger und sine Wunder ghört. Mir hänn die Gschicht vorhär scho vorgläse ghört. Ich find, in dere Gschicht könne mir sehr gueti und überzügendi Gründ finde, wieso mir an Jesus glaube. Si verdütlicht drei Kärnaspäkt vo Gottes Liebi und Zueneigig zu den Mensche.

Wo dr Zachäus uff sim Baum oobe sitzt, redet dr Jesus ihn plötzlich ah: Lk 19, 5

Lukas 19,5 B:DNTP

5 Als Jesus an die Stelle kam, blickte er hoch und sagte zu ihm: »Zachäus, steig schnell herab. Ich muss heute in deinem Haus zu Gast sein.«

Do gsehn mir schön die ersti Facette vo dr Beziehig vo Gott zu uns Mensche:

1. Jesus losst sich voll uff dr Zachäus ih. Es interessiert in nid, dass dr Zachäus schlimmi Sache gmacht het und sini Mitmensche abzockt. Är seit ihm dütlich „Ich akzeptier di so, wie du bisch. Du bisch okay“. Jesus nimmt uns, wie mir sinn. Egal wie mir ussehn, egal was mir mache, was mir könne odr nid könne odr was mir glaube odr nid glaube. Das find ich überzügend.

Jesus könnti jo kho und sage: “He Zachäus, ich weiss wär du bisch. Ich kenn di genau. Du bisch doch dr Oberzöllner, wo andere Mensche sLäbe zur Höll macht. Du bisch doch dä, wäge däm e huffe Lüüt liide mien”. Nei, all das macht Jesus nid! Är verurteilt dr Zachäus nid, sondern ladet sich sälber zum Ässe ih. Är will nid verurteile, är will verstoh.

Anschiinend find nid nur ich die Zueneigig vo Jesus überzügend, sondern au au dr Zachäus. Mir läse ei Värs spöter: Lk 19, 6

Lukas 19,6 B:DNTP

6 Der stieg sofort vom Baum herab. Voller Freude nahm er Jesus bei sich auf.

Dr Zachäus losst sich nid lumpe. Obwohl är däm Fremde Jesus no nie begegnet isch, und au nid weiss, wies är si Name kennt, und svilicht sogar bitz fräch isch, sich sälber izlade, losst är deheime alle härrichte und nimmt Jesus “Voller Freude” bi sich uff. Und das bringt mi zum zweite Punkt, wieso die Gschicht Jesus und sini gueti Nochricht so guet präsentiert:

2. Jesus verbringt Ziit mitem Zachäus, obwohl dLüüt rundume das gar nid witzig finde. Em Jesus si sozials Standing isch schlächter worde, well är mitem Zachäus gässe het.

Lukas 19,7 B:DNTP

7 Als die Leute das sahen, ärgerten sie sich und sagten zueinander: »Er ist bei einem Mann eingekehrt, der voller Schuld ist!«

In dere Gschicht kömme nid nur dr Jesus und dr Zachäus vor. Es kömme au no anderi Lüüt vor: Die “Normale”. Mensche wie du und ich. Sinn ind Schuel gange, hänn e Ussbildig gmacht, gschafft, ghürotet, hänn e Familie.... Die hänn nid lustig gfunde, dass Jesus zum Zachäus isch go ässe!

Abr Jesus isch das glich gsi. Ich find das mega sympathisch. Mir hänn sicher au ebber bi uns in dr Schuel kha, wo dr Ussesiiter gsi isch, odr mir sinns vilicht sogar sälber gsi. Wie schön, dases Jesus so glich isch, was die andere dänke: Är nimmt sich Ziit für die Ussesiiter! Und mir söttes au. Au wenns uns nid eifach fallt: Jesus isch uff die Ärde kho, zum uns uss unserem Egoismus, uss unserer Sälstverliebtheit, us unserer Sünd zbefreie. Damit mir wie är könne mit de Mensche unterwägs si, wo nid uff dr Sunnesiite vom Läbe stöhn: Dr Gflüchteti uss dr Ukraine, dr Bättler uss Rumänie, die miehsami Nochberin. Mir mien das aber nid elei mache. Jesus hilft uns drbi, wie mir bim dritte Akt vo dere Gschicht gsehn:

3. Jesus veränderet dr Zachäus zum Guete.

Mir wüsse nid genau, wenn das passiert. Abr irgendwenn bi däm Ässe veränderet sich öbbis bim Zachäus.

Lukas 19,8 B:DNTP

8 Aber Zachäus stand auf und sagte zum Herrn: »Herr, sieh doch: Die Hälfte von meinem Besitz werde ich den Armen geben. Und wem ich zu viel abgenommen habe, dem werde ich es vierfach zurückzahlen.«

Vo dr Liebi und Annahm vo Jesus so beriert, git dr Zachäus alles zrugg, wo är ungrächtfertigt gnoh het. Über dä Teil vo dr Gschicht luegt me gärn drüber hinwäg. “Dä Zachäus, dä isch eh steiriich gsi, was kostets ihn, jetzt öbbis zruggzgäh!” Dänke mir denn. Mir stelle uns dr Zachäus bitz als antike Elon Musk vor: Au wennr 99% vo sim Vermöge würd wäggäh, wär är immer no unändlich viel richer, als mirs zämme do inne jemols wärde si!

Aber so isches bim Zachäus nid gsi. Ich ha e paar Kommentär zu däm Text gläse, und wohrschinlich – und ich ha mir das vorhär no nie überleggt – isch är nochär bitter arm gsi. Abr dr Zachäus het gwüsst: Mit däm Jesus hanich mi Glück gfunde. Lieber isch är e Bättler mit Jesus als e König ohni ihn! Das find ich e tolli Gschicht. Wäge Jesus stellt dr Zöllner Zachäus sis ganze Läbe uffe Kopf.

Ich find das so schön: Jesus nimmt uns, wie mir sinn, ohni Druck, ohni Leistig. Aber är losst uns nid so. Mir alli hänn Schwächene, Fähler, Sache wo mir nid stolz druff sinn. Wie dr Zachäus. Är isch wohrschinlich au nid stolz druff gsi, dass är dr gröschti Abzocker in Jericho gsi isch. Und Jesus seit nid eifach „Egal“ odr “mir isch das glich”, sondern „Jä, das isch nid guet, und mir schaffe zämme drah“. Das git mir e mega Hoffnig. Für mi Läbe. Und für dins.

Jesus losst sich voll uff dr Zachäus ih. Är interessiert sich für ihn. Är verbringt Ziit mitem Zachäus, trotz dr öffentliche Meinig vom Zachäus. Und är veränderet ihn zum Guete.

Ich find die drei Sache wirklich überzügend an Jesus – Ich hoff, ihr au. Und ich hoff, ihr könned in däm Jesus die Hoffnig finde, dass sich Läbe und Umständ ändere könne, sige das dini eigene odr vo de Mensche, wo dir wichtig sinn. Amen.