Isch ds Evangelium hüt no relevant

Isch ds Evangleium hüt no relevant?

Isch ds Evangleium hüt no relevant und wenn ja was machts us?

Me sehnt sich zrugg in di alti Ziet… Zältevangelisatione, ufrüef zur Umkehr, Du bisch vo Gott gliebt, gschaffe in sinem Äbebild, dini Sünd trennt di aber vo Gott aber da gids en uswäg… Jesus Christus Gott höchst persönlich wird Mensch, läbt es makelloses Läbe und stirbt für die… D Kosequenz vo dinem Fählerhafte läbe isch so begliche worde und wird dier als gschenk abotte…. D Frag isch ob du das wetsch ahneh? Wenn ja wirsch du en Ehwigkeit im Himmel däffe verbringe!

Mer erhoffen üs erwekig aber begägnen ir Schweiz zuenhmend en Gsellschaft wo zfriede isch mim Läbe so weis isch… Hoffnigsvoll ind zuekunftblickt und religiöse Institutione meh misstraut als susch igedöppisem! Mier gads wunderbahr ohni Gott… wiso sötti mini Idee vome schöne und freie läbe eifach so ufgeh? Warumm sötti d Herrschaft vo minem Läbe öpperem Avertraue wo nid griefbahr nid sichtbahr isch?

mer sehnen üs das üsi nächste ires Läbe Jesus übergäbend verzellend ihne das sie Sünder sigend und wunderen üs warumm das das nid achunnt… mer sägend zum z evangelium azneh und z realisier dasme d Vergäbig vo Jesus brucht müemer ine zersch ufzeige das sie Sünder sind aber igedwie dringt die Nachricht nid bis zu ine dure…

Als Teenager bini vo Adonia iglade gsie als Evanglist in Teenslager z gah. D Teenslager sind so ufbaut das an zwei ufenand folgende Abende en externe Prediger verbiechunnt z Evanglium z verzelle… nach minem erste isatz nach minem erste Abig isch öpper uf mi zue cho und hed gseit isch ja scho schön was du üs da verzellt hesch aber du hesch de lüt gar nid gseit das sie sünder sind und drumm Vergäbig bruchend wie erhoffsch du dier das me da zum glaube chunnt? Das hed mi mega trurig gmacht und au zimmli fest fragend zrugg lah… als christlich sozialisierte Bueb hani nie es problem demit kah dasi sündige… sondern villmeh demit dasi mi nutzlos gfühlt han… woni realisiert han das Jesus real isch isch für mie vo all dene biblische gschichte vo all dene Predigte und allne inputs woni kört han nur öppis so richtig zentral wichtig worde! Jesus wet sis Rich uf dere Wält nid ellei baue… i daf mitmache er wet mie bruche… die ussag vo demm Teilnehmer i demm Lager hed mi is spuele bracht wili denkt han hä jetz hani denkt Gott chan mi da bruche und jetz jetz chunnt da eine und seit so wie du das gmacht hesch chasch nid brucht wärde Gottes riech z vergrössere…

I weis nid ob du au scho ähnlichs erläbt hesch.. ob du demm Kolleg würsch rächt gäh dasme zersch muen erkläre dasmer Sünder sind bevor me z evangelium chan ahne oder ob du au scho mal gäge wand gloffe bisch mit dine vier punkt oder die vilicht gnau so wie i gfragt hesch was gnau isch gueti nachricht an demm das mini Fähler vergäh wärdend… i meine di direkte Konsequenze hani ja treit und so schlimm bini ja gar nid…

I bin überzügt gsie… wenn d erkenntnis das Jesus mi bruche wet mis läbe umkrämplet hed und mi ine nachfolg vo Ihm gruefe hed denn wetti wieter über das zügnis geh au wenn z lehrbuech vo Evanglisation Explosiv, de Evangelisationsleitfade vo Adonia und die vier Punkt ganz klar anderi asätz bruchend…

Hüt weisi so komisch wieni mi denn gfühlt han woni die Rückmeldig kreigt han bini nid… S gid vermehrt in üsere Gsellschaft mensche wo Kulturell nümm dämm klische entsprächend womer no vor 30 Jahr ka hend… Lüt wie en Boppi, de Gscheftsleiter vo Campus für Christus schriebend über en Paradigmewächsel vonere Schuldkultur hie zunere Schamkultur bi üs i de schweiz… Z Problem vor Gsellschaft verschiebt sich vo i han en fähler gmacht hie zu i bin en fähler… Gueti nachricht isch also zuenhmend nümm du bisch vo dine Fähler freigsproche sondern he du bisch gewollt, gliebt und wärtvoll! Beides ir Bible tüf verankereti Wahrheite… Einersietzs dasmer freigsproche sind vo üsne Fähler aber au dasmer äbe kein Fähler sind!

Das Gott sine Sohn gschickt hed daser stellverträtend für üsi Sünde am Krüz gstorbe isch isch absolut wahr und das Gott dier dis Läbe gschnekt hed wiler die als würdig empfindet und dine Wärt in sindere Liebi definiert isch gnau gliech war wie z erste!

Lueg das was Jeus am Krüz wieder guet gmacht hed isch üsi Sünd… Sünd isch Zielverfählig es wandle usserhalb vo demm wo sich als Wahrheit definiert! Weni lüge, klaue etc. denn machi en Handlig wo mi z Ziel verfähle laht… aber au weni mi als Wärtlos emfinde weni glaube das mi niemer will und bruche chan denn gangi am Ziel verbie! Au weni in spiegel luege und denke was isch denn das für e hässlichi fratze denn schüssi a demm verbie wo Wahr isch! Jesus macht am Krüz beides er zallt für die Sünd womer gmacht hend… aber er bezügt au das mier Liebeswürdig sind. Da wird üse wärt und üse Läbessinn definiert!

Für dä wo sich schuldig fühlt isch vergäbig gueti Nachricht und für dä wo sich nutzlos und wärtlos fühlt isch Liebi und Gwolltheit gueti Nachricht… Und beides isch für alli gueti Nachricht! Unterscheide tüemer üs drin was dasmer zersch köre und begreiffe müend!

Alphalive schwiez schwätzt vonere verschiebig wieme zum Glaube findet und drin wachst… Jahrelang isch üsi Kultur prägt gsie vo 1.Glaube 2.Mache 3. Dezueköre… me hed sich bekehrt hed sis läbe gänderet und sich re gmeinschaft agschlosse… das isch Schuldkultur… Schamkultur isch 1.Dezueköre 2.Glaube 3.Mache… i erkenne dasi Wärt und Sinn han durs aschlüsse an e Gmeinschaft, dött drus use wachst Glaube was wiederum en änderig vo mim Läbe nach sich ziet…

Üsi Wält isch sich unglaublich schnell am wandel nid nur ir Kulturfrag sondern au im Zämeghörigkeitsgfühl ir Digitalisierig im zuegang zu Informatione und Agebot… wie gross isch Gott daser dene veränderige nid hinedrei springe muen sondern scho sit afang ah en Antowrt ka hed uf die Frage wo vilicht au jetz ersch neu ufkömend…

Du fragsch di wo köri hie? Gott seit du bisch sis Kind, ärbe vo sinem Reich und zueghörig zu sinem Volk… Sis kind sie heisst du bisch gliebt vom Höchste, ärbe vo sinem Reich z sie gid dier Vertraue und en uftrag und zu sinem Volk z köre gid dier heimat und idendität! Mit em Natel hämmer en ultra schnelli informationsquelle wo mid so vill informatione gfüllt wird dases unmöglich isch alles ufd richtigkeit prüeft z ha… mir Bible hemmer en Informationsquelle wo üs wahrheit gid au wenn si nid immer ufe ersti blick sichtbar isch… z coole isch dasmer ds eine mim andere verbinde chönd… frag mal z internet was d Bible über dine Wärt seit, ob Gott di liebt, är en Machtinhaber isch wo sini macht missbrucht oder zum guete isetze…

Di soziale medie lönd en trend in sekundeschnelli um di ganzi wält reise wo lüt in Australie en Tanz zumene Dütsche lied machend wo d Mensche in Asie und Amerika fierend und nahmachend! Üse glaube gid üs dur de Heilig Geist aber en schnelleri und tüveri verbundeheit… D Gmeind isch nid es Hus wo drei Buechstabe vorne druf stönd sondern d verbundeheit vo Christe wältwiet… Jesus seit d Gmeind isch sini Brut und da wird klar dases nid x verschiedeni Brüt gid pro dorf sondern das du zäme mit em christliche influencer us Russland zäme mim Amerikanische christ gnauso verbunde bisch wie zu demm wo mid dier im glieche gebäude Gottesdienst fiert! Nutz die möglichkeit wo da üsi Multimedialandschaft bütet di inspiriere z lah vo Christe uf de ganze wält!

Z Evanglium isch gueti Nachricht und i bin überzügt das es hüt gnau gliech fest relevant isch und antowrte bütet… gnau gliech gueti und erfreulichi Nachricht isch wie no vor 2000 Jahr… Vilicht hed sich d Not vom Mensch ir schwiez verschobe aber egal wohie sie sich verschiebt Gott chunnt mid sinere guete erfreuliche nachricht nid z spat!

D Frag isch hämmer de muet das sich üse mitmensch nid im glieche chronologische ablauf wie miers gmacht hend muen Gott nächere und d frag isch simmer muetig üs z überlege was das würklich gueti nachricht gsie isch für üs und stömer dezue? Findemer en überzügig dases würkli gueti Nachricht isch? Will denn wärdemer begeisteret! Und simmer muetig no meh vo dere Guete nachricht welle z begriefe? Händer no Hunger? D mensche um üs händ hunger und probierend sie uf verschiedensti art z stille… Jesus seit er sig z lebendige Wasser und z Brot vom Läbe und er bewiests indämm er scho lang en antowrt uf üsi not vo Morn und mini offene frage vo übermorn parat hed!

I wet üs muet mache uszbräche us me gednake i dere Reihefolg muen sich en Mensch Gott nähere und i wet üs muet mache wieter z forsche was das gueti Nachricht bedütet und was Gott au für mis läbe no meh guets parat hed will i gluebe wemer mitenand wietersuchend denn wird üsi läbziet nid länge alles z entdecke und üses Für üse hunger au nid eifach im nirgendwoh verlaufe… Und das wünschi üs! Dasmer suchend sind und findend dasmer hungrig sind und üs sättige lönd! Dasmer Läbend nid ersch wemmer stärbend sondern scho jetz da und hüt! Amen