大衛戰勝歌利亞

前言

喺撒母耳記上第17章，大衛戰勝哥利亞呢個故事裏面，好多時都係兒童主日學裏面分享嘅訊息，令到我哋好容易有一個前設，認為呢一個係一個兒童故事，或者係寓言故事嘅素材，說明我哋點樣可以打敗我哋心目中嘅巨人。思考一下點解我哋喺兒童主日學當中好鍾意分享呢一個聖經嘅章節，因為呢一段係比較唔混淆嘅經文，喺主日學當中，呢段經文沒有講到大衛嘅黑暗，令我哋都可以叫小朋友去學習大衛，勇敢咁去面對生命當中嘅巨人。但我哋細心嘅去思考一下，呢段聖經係咪只可以同小朋友去查考呢？定係對今日嘅我哋，神都有訊息比到我地？ ？呢個亦會唔會係我哋今日讀經嘅其中一個常態，就係認為讀咗一次就夠呢？就好似停留係小時候對大衛戰勝歌利亞帶出既訊息，我哋好容易墮入睇完一次聖經，對訊息嘅吸收，就係一個永恆不變嘅訊息，因為我哋睇完之後，所經歷嘅訊息帶嚟嘅感動，好容易覺得呢個就係神俾我哋呢段經文唯一嘅訊息，驅使我哋睇完一次，明白咗一次，就冇再去追求更加多，就好似大衛戰勝哥利亞，其實唔淨係俾小朋友嘅訊息，就求主透過今日嘅訊息，比我哋睇到，聖經上面唔同嘅章節，都係對我哋今時今日嘅說話。我哋同心禱告。

（禱告）

大衛同哥利亞決戰嘅呢一個場景，其實係橫跨整個撒母耳記上嘅第17章，一共有58節，不過呢，今日我想喺當中唔同人物嘅角色背景中去睇返我哋有啲咩嘢嘅反省同埋得着喺裏面。對於我嚟講，好容易將細個主日學所睇嘅訊息影響，就會只係集中睇大衛同哥利亞呢兩個人物，從而去學習以大衛做榜樣。真心睇晒58節經章，發現裏面有好多唔同嘅人物，專心去做對比嘅時候，就發現有唔同嘅訊息。

大衛兄長VS大衛

假如睇返前一章，你會見到大衛受膏立嘅過程，當時連大衛嘅爸爸，就算係撒母耳，都冇諗過大衛就係會比上帝膏立為王嘅一個人，在第16章睇到，撒母耳第一眼喺啲兄長當中，就睇見以利押，第6節話佢見見到以利押，就心裏說，耶和華的守膏者必定在他面前，睇埋第7節，判斷到撒母耳有呢個諗法，應該係以利押外貌同埋高大嘅身材都望起上嚟好似一個王，但從16章第7節提到耶和華都對撒母耳說叫佢唔好睇人嘅外表，因為人先至睇外表，耶和華睇嘅係內心，然後撒母耳再睇埋另外嗰六個仔總共七個仔，耶和華都唔係要揀呢啲，連佢爸爸耶西，都根本就忘記咗佢仲有第八個仔，嗰個最細又係牧羊嘅大衛，大衛就係呢一班世人眼中睇嚟比大衛更加似王嘅兄長前面被撒母耳膏立，可以想像到哥哥們當時嘅心態。

咁返返去第17章嘅時候，當耶西叫大衛去拎啲嘢食俾佢個三個哥哥們嘅時候，哥哥們當時已經係軍隊當中嘅一員，應該係佢哋嘅身高同體型，本來就係比較適合喺前線同人打仗。當三個哥哥見到大衛嚟到軍營嘅時候，大家記唔記得哥哥們嘅反應係點呢？

當大衛同一旁嘅以色列人講，歌利亞呢個未受割禮嘅非利士人，竟然咁向永活嘅神嘅軍隊罵陣嘅時候，哥哥點反應？我哋嚟睇吓17章第28節，大哥以利押聽見了就向大衛發怒說，你為什麼下這裏來呢？在曠野的那幾隻羊你交托了給誰呢？我知道你的驕傲和你心裏的惡意。你下來是要看打仗。

當以利押見到大衛都夠膽去回應巨人嘅挑戰，而作為大哥嘅佢，因為見到哥利亞咁大件，再加埋細佬先至係被膏立嘅呢件事嚟睇，佢就出於羞愧大罵大衛，當中喺呢件事情裏面更加能夠回響返剛才16章所講，耶和華看人係看合乎他心意嘅人，係看內心，哥哥們呢個人設放喺呢一章裏面俾我哋可以睇到一個對比，就係回應神揀選大衛為王嘅心意，所著著重嘅係內心。

歌利亞 VS 掃羅

喺17章嘅一開始冇耐，就有形容歌利亞呢一個人物，我哋睇第四至到第七節，就會睇到點解以色列人咁驚哥利亞，

4–7

中文新標點和合本研讀本聖經(神版)－經文(繁體) 第17章

4 從非利士營中出來一個討戰的人，名叫歌利亞，是迦特人，身高六肘零一虎口；5 頭戴銅盔，身穿鎧甲，甲重五千舍客勒；6 腿上有銅護膝，兩肩之中背負銅戟；7 槍桿粗如織布的機軸，鐵槍頭重六百舍客勒。有一個拿盾牌的人在他前面走。

大家如果睇和合本聖經，第四節講到歌利亞身高六肘零一虎口，都唔知佢講乜，如果用新譯本都明多少少，三公尺，咁究竟佢同幾高呢？有一啲學者真係會去探討呢一啲嘅問題，會搵唔同嘅抄本，去睇返哥利亞究竟有幾高，亦都用抄本對比返當時嘅文化去推敲返歌利亞嘅實質高度，而比較多嘅譯本會支持其實哥利亞大約有兩米高，但其實不論係兩米定三米，對於今時今日嘅我哋嚟講，佢都應該好似米高佐敦姚明咁嘅高度，比起我地平常人都會係驚一驚嘅

Ref ppt 圖：正常以色列人 與 歌利亞的高度

然後再睇吓聖經講，佢頭戴頭盔，身穿鎧甲，甲重5千舍客勒， 5千舍客勒究竟代表幾重呢？對比返新譯本，就係57公斤，一個人淨係穿起個裝甲，已經有57公斤，再睇埋第七節鐵槍頭重600舍客勒， 600舍客勒代表佢個矛頭撇重7公斤，可想而知佢都真係幾得人驚。

最少對於我呢一個咁細粒嘅人嚟講，都真係會驚。實不相瞞，我都係得 1.5米，重45公斤左右，我連佢個盔甲一紮落嚟，我都應該軋死咗。

如果咁樣去俾小朋友去聽，用歌利亞代入成我哋生命之中去面對嘅一啲大嘅困難不足為奇，但如果人物喺聖經當中係不斷做對比係其中一個獲取訊息嘅方法，同哥利亞可以對比既人物究竟係邊個呢？會唔會係同掃羅呢？

如果歌利亞真的是那麼高，那我們就試下用高度同掃羅作對比。我們知道大衛不是很高，因為第16章已經說了他不是身材高大。但掃羅有多高呢？如果根據撒母耳記上9:2，他比眾民高過一頭。我想，當時「比其他人高一個頭」未必有六呎九吋高，但已經是相當高了，因為當時以色列人選一個王是要去打仗的。他們不要青靚白淨的小鮮肉，是要找一個高大威猛的；掃羅高大威猛，揀選他就能夠為以色列人打仗。如果真的要跟歌利亞打鬥的話，以色列人最容易想起的就是掃羅。

在撒母耳記上第8章，神早早就已經警告以色列人：你們揀選一個王，你們要記住你們必定成為王的奴僕。你們不要這麼自鳴得意，為自己選一個王出來代替耶和華；事情沒有那麼簡單。你們揀選一個王，你們最終只會成為他的僕人。第17章歌利亞所說的話讓我們想起這段聖經。歌利亞明白一個王要做甚麼───王是一個國家的首領和國家的主人，因此他們全部都是掃羅的僕人。接著第8節下半節：「可以從你們中間揀選一人，使你下到我這裡來。」這有點諷刺，因為這個「一人」老早就已經揀選好了───第9章，以色列人已經揀選了掃羅做王。第10節非利士人這樣說：「我今日向以色列人的軍隊罵陣。你們叫一個人出來，與我戰鬥。」（17:10）但為甚麼要說戰鬥呢？因為，在第8章，以色列人最初要求一個王是要做甚麼呢？「為我們爭鬥，像列國一樣。」所以當年撒母耳聽到時心中不悅，因為耶和華一直是他們的元帥，祂為他們爭鬥。以色列人堅持要找一個人為他們爭鬥。所以第17章去到歌利亞的戰爭時，以前掃羅能打贏比他矮的人；但今次有巨人出現了，國家正需要一個像掃羅一樣高大威猛的戰士的時候，他卻不敢出來，因為掃羅第一次看到比自己更高的人，因此不敢出來打仗。

這樣對比之下，我哋睇吓有啲咩訊息喺當中？會唔會又好似我哋剛才睇大衛同佢嘅兄長嘅對比當中所睇到嘅一樣？就係耶和華選擇人並唔係睇佢嘅外表，喺撒母耳記上第8章，神早早就已經警告過以色列人，你哋選擇嘅一個王，同神所選擇嘅一個王，當中嘅標準就已經唔一樣。呢兩個被對比，就正正話俾我哋聽，我哋點樣去揀咩係我地生命中至為重要？係應該聽從神嘅旨意，按着神嘅標準去選擇？定係好似以色列人、撒母耳、耶西咁樣去以外表，外在望落去嘅能力去選擇呢？

掃羅VS大衛

講到呢一度，不得不試吓從掃羅同大衛去作比較。點解要咁樣講呢？因為呢個以色列人所選出嚟嘅王，都係按住世人嘅標準去行事，我哋一齊去睇吓17章第31節至39節。

當掃羅聽到大衛要去同哥利亞戰鬥，掃羅第一個反應，就係叫大衛唔好去同哥利亞打仗，因為他看來太年輕。就算大衛用佢點樣經歷過神嘅見證去作證據，佢係有能力去戰勝哥利亞都好，掃羅口裏面講：你可以去了，耶和華必與你同在。

但行為上面呢？佢就十分之唔放心，將佢自己身上面所有嘅戰衣，鎧甲，通通比大衛着上去。去到呢個位置，有冇啲似曾相識嘅感覺呢？就好似有一種凍，係我媽媽先覺得我凍。

掃羅咁樣做，毫無疑問係出於好意嘅。佢用盡佢覺得有效嘅武器，各樣嘅裝備，去保護大衛。儘管係咁樣，大衛仍然放低咗啲頭盔，放低咗利劍，除咗件盔甲。咁樣嘅做法一啲都唔容易，因為大衛其實冇正式受過軍人嘅裝備，唔似專業嘅軍人喺戰場上面經歷過生死，佢放下呢啲專家所提供嘅援助，而且赤手空拳去同哥利亞去決鬥。

係啲乜嘢驅使大衛可以做到呢件事嘅呢？一方面，佢知道佢穿着住唔合佢身，高佢好幾個頭嘅掃羅嘅盔甲係不切實際嘅，另一方面，佢知道佢自己擅長嘅係乜嘢，神喺咁多年來喺牧羊嘅時候同佢喺埋一齊，佢知道投石器同埋石仔，已經足夠將巨人殺死，更加知道佢係靠着萬軍之耶和華去得勝。

總結

大衛的內心

假如我剛才之前大衛兄長同掃羅同大衛嘅比較，都提及到神看重大衛嘅係內心，咁喺呢一個情景裏面，我哋講緊大衛嘅內心究竟係啲乜嘢呢？會唔會就係要做一個謙卑，對神嘅動工充滿想像力，同識得選擇咩叫做適合自己嘅生活呢？定還是側邊有專家嘅意見，文化上面嘅隨波逐流，人云亦云咁樣生活呢？

三對嘅人物對比之後，我嘗試歸納當中我哋可以得到嘅訊息，究竟我哋要仿效大衛嘅心，係一個點樣嘅內心呢？

對上帝嘅作為充滿想像力

撒上 17：40

試想像一下當時嘅情景，大衛喺一班專業嘅軍隊當中，一邊係以色列軍隊，曾經打敗其他嘅民族，經驗豐富，站立喺非利士人面前，又係另一班比以色列軍隊更加高大嘅軍隊，大衛卻懷着信心，知道上帝嘅作為奇妙，與世人所想嘅不一樣。

我可以幻想，喺兩班咁強大嘅軍隊中間，大衛喺個溪澗裏面揀咗五粒石仔，係溪澗喎，佢一定係要跪喺度，去揀個五粒石仔，然後拎住佢呢五粒石仔，同佢呢一位咁矮嘅人仔，就向牛高馬大，一啲都唔正常嘅大人，去投呢啲石仔去擊倒佢，呢一份嘅信心，來自於佢對上帝嘅作為，充滿咗想像力，佢冇為上帝嘅作工立下任何嘅界線。

好似馬太福音17章20節

耶穌回答說：「因為你們小信。我確實地告訴你們：如果你們有像一粒芥菜種子那樣的信仰，就是對這座山說『從這裡移到那裡！』它也將移開；而且在你們，將沒有不可能的事。

我哋有冇對上帝嘅作為懷着呢一種想像力？定係人云亦云，隨波逐流，用我哋從細到大嘅理性，去框住咗上帝嘅作為呢？我哋有冇呢個勇氣，喺兩個咁強大嘅軍隊，就係好似呢個世界咁，謙卑落嚟，跪喺度，去揀上帝為我哋預備嗰五粒細石仔呢？

與神親密的關係

咁當然，大衛係靠着佢所經歷嘅去對神建立呢一份嘅信心，我哋要學嘅，就係我哋同神有冇一個親密嘅關係。

撒上 17：36–37

•36 你僕人曾打死獅子和熊，這未受割禮的非利士人向永生　神的軍隊罵陣，也必像獅子和熊一般。」37 大衛又說：「耶和華救我脫離獅子和熊的爪，也必救我脫離這非利士人的手。」

大衛能夠帶着呢五粒細石仔去打敗哥利亞，係基於佢一直以來同神嘅關係，如何去經歷神，呢啲嘅經歷，令到佢知道神嘅大能，呢度講到佢曾經都係用呢啲嘅方法，去對付獅子同熊，去保護佢嘅羊群，呢啲嘅經歷，令佢知道耶和華一定會帶領佢脫離菲利斯人嘅手中。

詩 16:8

我讓耶和華常在我面前，     因他在我右邊，我就不致動搖。

而佢喺詩篇16章八節嘅咁樣寫到，呢個一定係佢嘅座右銘，佢同耶和華所建立嘅關係，就係我哋要學效嘅習慣，我哋珍唔珍惜同神有一個親密嘅關係呢？以致我哋去到要去同世界打仗嘅嘅時刻，我哋能夠靠着經歷神嘅大能，對神可以有足夠嘅幻想力，佢一定用佢奇妙嘅方法帶領我哋去勝過。

對萬軍之耶和華有絕對的信心

而呢一種嘅關係，就已經好足夠令到大衛對耶和華有絕對嘅信心，試想像我哋喺敵人面前，我哋有冇辦法去同對方講，我哋係靠着萬軍之耶和華嘅名去得勝？

•撒上 17：45–47.

45 大衛對非利士人說：「你來攻擊我，是靠着刀槍和銅戟；我來攻擊你，是靠着萬軍之耶和華的名，就是你所怒罵帶領以色列軍隊的　神。46 今日耶和華必將你交在我手裏。我必殺你，斬你的頭，又將非利士軍兵的屍首給空中的飛鳥、地上的野獸吃，使普天下的人都知道以色列中有　神；47 又使這眾人知道耶和華使人得勝，不是用刀用槍，因為爭戰的勝敗全在乎耶和華。他必將你們交在我們手裏。」

但大衛就可以做到，佢最後對住歌莉亞，一剎那就督破咗對方同自己嘅分別，比我哋高好幾個頭嘅歌莉婭，或者菲利斯人，係靠着世人認為好work嘅刀槍和銅戟嚟攻擊以色列人，但大衛打贏歌利亞，係靠着萬軍之耶和華的名。

當代入喺現今世代當中，我哋面對世界嘅唔同挑戰，我哋有冇好似大衛嘅信心，靠着萬軍之耶和華的名，去勝過呢啲挑戰呢？定係，我哋覺得一定要有刀槍和銅戟，呢啲好屬世嘅武器才能勝過呢？

得勝全靠耶和華

詩篇19:14

耶和華我的磐石，我的救贖主啊，願我口中的言語、心裡的意念在祢面前蒙悅納。

對萬軍之耶和華有絕對的順服 和 感恩

繼續去睇大衛嘅內心仲有啲乜嘢可以令我哋學學習，就係佢嗰份對耶和華嘅順服同感恩，試想像下，大衛唔係打贏咗呢場仗之後就即刻成為王，撒母耳記之後嘅10幾章，都係講掃羅出於妒忌而去追殺大衛，但係大衛對耶和華所膏立嘅掃羅，佢心存敬畏，佢敬畏嘅唔係掃羅呢個人，而係耶和華，佢願意順服喺耶和華嘅旨意當中。

代入喺今日嘅社會，當我哋得到一切嘅名利之後，又或者事事順利嘅時候，更加係我哋嘅考驗嘅時候，一切順利嘅時候，我哋會唔會再去思考順服呢個功課呢？大衛喺呢個位置，絕對係值得我哋去學習，佢心知耶和華與佢同在，知道佢有十足嘅把握贏到歌莉亞，佢其實點需要去怕掃羅呢？但佢選擇順服。

唔單單只係順服咁簡單，而佢亦都有一份感恩嘅心，佢知道得勝全在乎耶和華，佢所有嘅經歷，全在乎耶和華，以致佢喺詩篇裏面都多次講，佢如何去稱謝耶和華我哋嘅上帝，佢知道佢不可以忘記上帝嘅一切嘅恩惠。呢個亦都係我哋值得去學效嘅一點。

反思

再重溫一下我哋可以做嘅反思，喺呢啲人物嘅對比當中，去代入返我哋嘅生活，我哋有冇做到呢四點呢？

對於我嚟講，我哋身處喺近代，一個教育係一個好重要嘅時代，我哋比世上一啲固有嘅知識，好多時框限咗我哋嘅思想，以致我哋好容易去用我哋嘅理智，或者一啲世人覺得比較有智慧嘅方法去解決問題，呢一樣嘢真係會削弱咗我哋對神嘅作為去充滿着想像力。特別是我哋遇到困難嘅時候，我哋好容易會聽某一啲專家嘅意見，專家嘅意見固然有一定嘅公信力，但係對於我哋前途嘅方向，生活上嘅作主作王，我哋有冇足夠嘅信心， 100%完全交託喺神嘅手中，當面對神喺我哋生活上有一啲奇妙嘅作為嘅時候，我哋有冇辦法完全相信呢個係神嘅作為呢？定有時我哋覺得好順利嘅時候，會唔會又覺得係倚靠我哋自己嘅人嘅聰明呢？呢個真係我哋現代人嘅一個常態，值得我哋去反思。

當然第一步我哋最重要做到嘅，就係同神建立一個親密嘅關係，就係嗰種好似大衛咁，無時無刻都想稱讚神嘅大能，渴慕去與佢同在嘅時刻。

個人分享

先先喺度好感恩梁牧師比一個機會我可以喺台上面去分享訊息，好希望剛才分享嘅訊息對你既生命當中係有反省有作用嘅，以致我哋知道喺大衛身上要學習嘅係一啲咩嘅功課。

講到同神建立一個親密嘅關係，去渴慕同佢同在嘅時刻，我都好想喺呢度分享一下我最近一年，讀基督教研究裏面嘅一個最觸動我心嘅一啲嘅時刻，就係喺上年六月嘅時候，修讀釋經學嘅一科，令我去睇聖經時多左反省同埋改變，當中有學到好多唔同人對釋經學嘅貢獻，釋經學嘅歷史嘅時候，我有反省自己對讀經嘅認真嘅程度，以致今年都有推行一個讀經嘅計劃，呢個計劃原本係俾自己嘅，好感恩梁牧師願意俾我去同大家分享呢個計劃，叫我呢三年嘅讀經裏面多咗一班差唔多20人嘅同行者，真係十分感恩。

係釋經學歷史裏面，有兩個人物所經歷嘅，令我特別有感觸同反省。

第一個係中世紀嘅休格啦，佢係Define知識論嘅時候，佢去思考知識係從邊度而來嘅呢？我哋有睇聖經都會見到，敬畏耶和華是智慧的開端，當我哋去諗深一層，我哋嘅上帝係創天造地嘅上帝，我哋所見到嘅一事一物都佢所創造，所以依一啲一切嘅知識，呢一啲一切嘅邏輯，呢啲一切嘅秩序都係從上帝而來，所以休宇就話啦，認識聖經係愛從上而來嘅智慧，我哋點樣去研究聖經，解釋聖經，其實係一個敬拜嘅過程，我哋去追求神所賜落嚟嘅智慧，我哋渴慕知道佢更加多，呢個改變咗我一直以來覺得讀經就係交功課嘅一個行為，比我知道咗讀經係一個敬拜，敬畏神嘅過程，係一個好好嘅反省。

當然呢一個觀念，更加教導咗我睇唔明聖經嘅時候，就係要去尋求返嗰個賜俾我呢一啲知識嘅神上面，禱告尋求神俾我哋有聰明智慧去睇得明佢想俾我哋嘅信息。

第二個就係喺宗教改革初期嘅約翰加爾文，當馬丁路德去改革咗宗教之後，聖經完全開放比每一個人，呢個係何等大既恩典，約翰加爾文重新去思考基督嘅信仰，佢用盡一生嘅氣力去解釋聖經，佢開始寫釋經書，想寫完或者解釋完整本嘅聖經，當中亦都會有思想上面嘅更新，一路睇一路更新，呢本基督教要義到到佢死嗰刻有五個版本，呢個係我哋好值得學習嘅讀經，佢知道神會透過聖經不斷向我哋世人說話，向我哋不同世代嘅人說話，同一本聖經，向緊幾千年唔同階段嘅人去說話，喺當中會見到嗰種心意更新而變化嘅過程，呢個返返去我一開頭嘅簡介，我哋讀聖經嘅時候，會唔會以為睇完一次就足夠呢？定係不斷去尋求，不斷去做呢個敬拜嘅過程嘅時候，去感受神透過聖經對呢一刻嘅我究竟係有啲咩嘅對話呢？呢個係一個好大嘅反省。

再一次感恩今年嘅讀經計劃裏面有20位嘅弟兄姊妹陪我同行，我相信你同我嘅諗法好一樣，就係知道神會透過我哋每一次睇聖經嘅時候對我哋呢一刻去說話，就願神祝福我哋每一個讀經嘅時候都大大能夠讓神去開啟我哋嘅眼睛，透過我哋去睇聖經呢個敬拜敬畏神嘅過程，同神建立一個更加好嘅關係，亦都因為呢一啲嘅說話，影響着我哋嘅生命，讓我哋嘅生命喺呢一個世界上面比人哋睇到一個基督嘅信仰，俾人哋睇到現今世代裏面原來有一種選擇，就係活出基督嘅信仰，願主祝福大家。