從裡而變 讓神掌權

各位弟兄姊妹，我哋今日會讀馬太福音五章27至32節，我讀比大家聽。

馬太福音 5：27–32 中文聖經和合本（神版．繁體）

27 你們聽見有話說：‘不可姦淫。’28 只是我告訴你們：凡看見婦女就動淫念的，這人心裡已經與她犯姦淫了。29 若是你的右眼叫你跌倒，就剜出來丟掉，寧可失去百體中的一體，不叫全身丟在地獄裡；30 若是右手叫你跌倒，就砍下來丟掉，寧可失去百體中的一體，不叫全身下入地獄。 31 又有話說：‘人若休妻，就當給她休書。’32 只是我告訴你們：凡休妻的，若不是為淫亂的緣故，就是叫她作淫婦了；人若娶這被休的婦人，也是犯姦淫了。

《馬太福音》第5至7章其實係主耶穌一篇完整嘅講論，佢被稱為「登山寶訓」。所以，要明白呢幾節嘅經文，我哋先要明白「登山寶訓」嘅背景。

主耶穌係第4章宣告「天國近了，你們應當悔改。」呢度嘅「天國」並唔係指人將來去嘅地方，「天」係猶太人對神一個委婉嘅稱呼；而「國」強調嘅係王權。所以，呢句話嘅意思就係「神藉住基督，親自黎到人當中掌權」，既然係甘，人就唔應該以自己作主，而係要悔改回轉，比神掌管我哋嘅生命。

而今日嘅我哋既然會稱呼基督為主，咁神嘅權柄就應該臨到我哋生命每一個部分。

所以我地今日要探討嘅就係：一個真正被神掌權嘅人，佢嘅生命應該係點樣？

主耶穌喺5章17-20節講，佢唔係廢掉律法，而係成全 ；同時，佢提出一個很震撼嘅要求，主要求一個真正比神掌權嘅人，佢嘅義、佢嘅生命要比律法嘅精英、妥拉嘅教師（文士同法利賽人）更加超越，超越D咩呢？

主耶穌曾經提醒法利賽人：「先洗淨杯盤的裡面，好叫外面也乾淨了」呢個警告令我哋見到：外在符合規條，唔等於生命已經真正比神掌權。

就好似一個老公，家務、周年紀念、生日慶祝，樣樣做足；但若果佢心裏唔愛自己嘅太太，呢啲行為其實建立唔到真正嘅婚姻。同樣，神要嘅義，唔單純在於行為；而係一個真正被神掌權嘅人，理應是由心裡面比神改變，唔再滿足於最低限度嘅行為，而是主動追求神所要求嘅義、追求討神喜悅。

為咗講明呢個原則，主耶穌引用猶太人熟悉嘅律法作例子，揭示律法更深層嘅要求，其中中間就係「不可姦淫。」

係呢6節經文，我地見到3樣野：

(616字)

第一，神要掌權，而且要由裡到外掌管我地嘅生命。

「不可姦淫」直接嘅理解就係唔可以有婚外情，唔可以直接破壞神所定嘅婚姻關係，呢個固然係一個行為；但係主耶穌話：「凡看見婦女就動淫念的，這人心裡已經與她犯姦淫了。」神將「心裡動淫念」同「姦淫」直接畫上等號，因為神最想去改變嘅係我地嘅裡面，我地嘅內在必然影響我地嘅行為 — 正如一棵樹嘅根係爛嘅，結嘅果子就會爛；相反，一棵樹嘅根係好嘅，佢結嘅果子通常唔會太差。

當然，主係度唔係話行街、轆IG見到個靚仔靚女，第一眼覺得對方真係幾靚，就已經犯罪，因為雅各書提到：「私慾既懷了胎，就生出罪來；罪既長成，就生出死來。」，聖經明講：由私慾去到罪再去到死，係有一個過程；所以，主係度責備係我地明知自己係想入非非、係有唔好嘅諗法，仍然刻意望多幾眼、去Search下個個人、撳入去個Profile或者個廣告睇下，甚至會幻想，用對方去滿足自己嘅慾望。

大衛就係一個提醒。佢見到拔示巴之後，佢冇選擇停係度，佢搵人去打聽，搵人去帶佢番黎，最後發展成姦淫、欺騙同謀殺。所以，問題唔在於拔示巴有冇出現，都唔在於大衛望到拔示巴嘅第一眼，而係大衛容讓私慾帶住佢行，最後由私慾長出罪以及死；在於我地，可能係望多一眼、撳多一下、留低一段關係、保留一個不能見光嘅網站，雖然我哋係冇做到最後一步，冇真係發展婚外情，但我哋私下一次又一次容讓，慢慢就變成私慾管理我哋，神都唔允許。

所以，一個被神權柄管理嘅人，係佢冇任何行動嘅時候，只係私慾係心裡面萌芽嘅時候，佢就認真對付，因為我地清楚知道神真正掌權係指連我地嘅心思意念都要比神管理，從裡到外。因此，真正比神權柄管理嘅人，唔係只會問：「我有冇做到最後嗰一步？」，而係問：「其實我嘅眼目、思想、慾望、選擇；乃至我部手機、電腦、IPad⋯⋯有冇比神去管理到？」。

其實情況好似滅蟻。我舊屋有一段時間有好多蟻，一開始我係見一隻撳死一隻，但係發現解決唔到問題，蟻仍然不斷出現；真正解決問題嘅方法，係用滅蟻藥消滅成個蟻穴。罪都係甘；姦淫，好似眼前見到嘅蟻，撳死一隻下一隻又黎，表面死左但其實成個蟻穴仲係度，；而神唔係只要我哋壓低表面行為，心裡就繼續充滿不潔嘅思想；神要處理嘅係成個蟻穴，祂要由根源去管理我哋。

第二，神要我地嚴肅、狠心、主動撇棄會引誘我地犯下姦淫嘅事物；我地唔單止要出手處理蟻穴，也要封住條蟻路、移走可能會引來蟻嘅食物。

主係29-30節中講：如果一隻右眼令我地犯罪，我地就唔要；如果一隻右手令我地犯罪，我地都唔要。當然，主喺度唔係叫我哋自殘，而係佢用呢個比喻去強調我地對罪嘅狠心同主動，而且要付代價：只要一樣事物係會令我地跌倒嘅，就算幾重要、幾鐘意、幾依賴、幾唔捨得，我地都應該去抌低，好似一條發炎嘅盲腸，唔切走就可能會死 — 一條盲腸定一條命，大家都會識揀。

正如保羅教導提摩太要逃避少年人嘅私慾，我地其實有好多方去逃避，例如當私欲出現嘅時候，如果係屋企ge，落去打場波，或者去商場行下；如果IG係經常試探到我地嘅，Del左佢；未婚嘅男女，唔好單獨一男一女去旅行。

如果一個帳號、一個網站、一個習慣、一個時間、一個地方，明知會令我地跌倒，就唔好只係話：「我會小心啲。」主耶穌叫我哋願意付代價去處理，唔單止要處理蟻穴，也要封住蟻路；唔單止求主改變我哋嘅心，也要主動切斷嗰啲令我哋跌倒嘅渠道。

最後，主耶穌講到離婚，佢並唔係轉咗話題，正如一開始所講，「不可姦淫」呢一條誡命本身就係關乎對婚約嘅忠誠。當時有人以為，只要比妻子一張休書，程序合法，就可以離棄她、另作選擇；但係，主耶穌指出：一張休書唔可以將不忠變成公義。主嚴肅對待婚姻，因為婚約係我地向神所立嘅約，唔係可以隨自己喜就拋嘅野，所以，呢條律法最終嘅意義係叫人從心裡面服從神所設立嘅婚姻關係，盡自己嘅能力維持對婚姻嘅忠誠。

當冇人睇見我地嘅手機、我地隻眼目、搜尋紀錄、聊天內容、感情抉擇時，究竟係邊個作王呢？

求主使我哋不只守住外面嘅界線，而係由心裡順服祂，主動逃避試探，亦忠於祂所設立嘅婚約。因為天國嘅義，從來唔係外表表演，而係讓基督在生命每一處作王。

而呢個原則其實唔係只適用於性或者感情方面；無論敬拜、金錢、說話、工作、關係，神唔係只問我有冇做到表面要求；祂問我嘅心有冇真係讓祂掌權。

（1406字）