Karsamstag TAKE OFF

Karsamstag

Zürcher Bibel Psalm 118

6 * Der HERR ist für mich, ich fürchte mich nicht,

was können Menschen mir antun?

Menschenfurcht zu Ehrfurcht

Ich chas scho bald nüme ghöre, ständig lisi ide Ziitig oder bim Ichaufe: “Halte Abstand. Schütze dich und andere.” Nach vier Wuche ide Umsetzig vo social distancing merk ich, wiemer die Parole langsam ufde Wecker gat. Klar. Es isch wichtig und ich halt mi au dra. Aber es isch ebe au schwirig. Ich vermisse d Kontäkt, zäme goge Velofahre, mitenand Znacht esse, am Abig ime Restaurant öpis goge ztrinke. Alles Sache, woni momentan mues druf verzichte.

fd

Abstand halte.

Das isch de Zuestand, wo au d Jünger din sind, nachdem Jesus Christus krüzigt worde isch. Jesus isch nüme da, keis Nachtesse meh mit ihm, kein Spaziergang durd Fälder vo Galiläa meh, alles isch verbi. Da isch plötzlich sone Distanz, Distance zwüsched de Nachfolgerinne und Nachfolger vo Jesus. E komischi Distanz, e schwirigi Distanz.

Vilich chönd mir i oisere Lag die Nachfolgerinne und Nachfolger vo Jesus bitz besser versta. Wenn plötzlich nüme isch, was vorher so selbstverständlich gsi isch. Jesus isch nüme da, er isch tot, krüzigt hetme ihn, er isch begrabe, ime Grab miteme grosse Stei vornedranne. Alles isch verbi.

Das isch die nöd ganz so glorriichi Botschaft hüt am Karsamschtig. Mir befindet ois am tüfschte Punkt vode Passion, vom Liidensweg vo Jesus Christus. Tüüfer gats nüme. Und für es paar Mänsche fühlt sich die jetzigi Situation vilich au wie sonen Tüüfpunkt ah. Abstand halte. Kei Kontäkt me. Eleige sii. Das cha sich au afühle, als würmer fasch nüm existiere. Und es zeigt sich, wie wichtig so Kontäkt für ois Mänsche sind. Und au wenn du dich vilich nöd so zude Gsellige zellsch: nur scho d Möglichkeit nüme zha, öper chöne zträffe, das ängt doch irgendwie ih! Mir zumindest macht nur scho de Gedanke müe, dasi öper jetzt füres wiili nüme gse chan.

Gad etz, gad i dere schwirige Ziit, dörfemer ois zu Jesus Christus bekenne. Er isch mit ois drin, gat mit ois dur die schwirigi Ziit!