Trinitatis

Nikodemus

E Geburt isch öpis einzigartigs. Es nois Läbe wo ufd Wält chunt, das laht chum öper chalt. Alles veränderet sich, das chline Wese chrempelt de ganzi Alltag um. So zumindest stell ichs mir vor, wenn es nois Baby ufd Wält. Die einte vo oi wüsseds vilich scho, mir erwarted bald e sones nois Chind. Endi Monet söts cho. Wenns denn au cho wet! Mal luege wie pünktlich dases isch. Sie hend warschinli vill meh Erfahrig mit Babies als ich. Trotzdem möchti hüt genau über das rede: über s noie Läbe, über s Gebore wärde.

Ide Gschicht womer ghört hend, seit Jesus em Nikodemus, dass die wo nöd vo obe gebore werded, Gottes Rich nöd gseh chönd. D Geburt het also irgendöpis z tue mitde Sichtbarkeit vo Gottes Riich. Doch fangemer zersch nomal vorne ah. Wer isch de Nikodemus überhaupt und wo triffter Jesus?

De Nikodemus isch en Pharisäer. Eine vode Gägner vo Jesus eigentlich. Aber under dene Gägner hets ebe au Sympathisante. Sötigi wo gsehnd, dass de Jesus öpis Speziells isch, daser würkli vo Gott chunt. De Nikodemus chunt also zu Jesus, zmitst ide Nacht. Da chame sich frage, het Jesus gschlafe? Heteren müsse ufwecke? Dass de Nikodemus ide Nacht chunt, zeigt zwei Facette vo dere Gschicht uf: Zum eine het de Nikodemus nöd wele, dass anderi ihn gsehnd, drum ischer ide Nacht, heimlich zu Jesus gange. Er isch en heimliche Sympathisant gsi. Zum andere spillt s Johannes-Evangelium mitem Liecht und de Dunkelheit. Die wo im Dunkle sind, gsehnd nonöd, wer Jesus würkli isch. De Nikodemus wo ide Nacht, im Dunkle chunt, isch also nonöd ganz is Liecht gsetzt worde, er weiss nonöd alles.

So spricht de Nikodemus Jesus also ah alsen Lehrer, wo vo Gott cho isch. Er weiss, dass Jesus öpis speziells isch, dass er Sache seit und macht, wo nöd vomne Mänsch cho chan. Er isch fasziniert vo dem Jesus. Und Jesus, wie antwortet er em Nikodemus? Wer nöd vo obe gebore wird, cha Gottes Riich nöd gseh. Etz macht de Nikodemus em Jesus es Komplimänt, oder versuecht zmindest, und Jesus antwortet so druf? Das cha eim schochli vorde Chopf stosse. Was het de Nikodemus falsch gmacht? Hetter öpis falsch verstande?

Wemer nöcher anelueget, gsetme, dass de Nikodemus weiss, dass Jesus vo Gott gsändet isch, dass Gott dur ihn würkt. Was isch so falsch a dere Ussag, dass Jesus de Nikodemus so zruggwiist? S Problem wo Jesus mitem Nikodemus het, isch dass de Nikodemus seit, daser weiss, dass Jesus vo Gott gsändet isch. Er weisses, will Jesus Zeiche macht, wo nur vo Gott cho chönd. Das heisst, de Nikodemus weisses mit sim Verstand, mit sim logische Denke hetter us dem allem gschlosse. S Problem wo Jesus mitem Nikodemus sinre Istellig het, isch, dass de Nikodemus ebe nöd mit sim Herz verstat, sondern mit sim Chopf.

Demit öper mit sim Härz verstat, wer Jesus isch, bruchts sone Neugeburt. E Geburt wo ebe mitem Verstand, mitem Chopf nöd zfasse isch. Nur im Glaube, im Wüsse mitem Härz duet sich s Gheimnis uf, wo drin steckt. Glaube isch es Gheimnis, öpis wo mir schwär chönd fasse, aber trotzdem ischer da und laht ois wie Chind glaube, vertraue uf Gott, denn werded mir sis Riich gse. Drum seit Jesus em Nikodemus: wer nöd vo obe gebore wird, cha Gottes Riich nöd gse.

Das mitde Geburt isch ja sone Sach. Me weiss eifach nöd, wenns losgat. Wenn ihr sälber Chind hend, wüsseder das besser als ich. Mir sind im letste Monet und es chan eigentlich jede Momänt losga. Aber me weisses eifach nöd! S Chind entscheided sälber, wenn dases sich zeigt. Und so ähnlich versuecht au Jesus am Nikodemus z erchläre, dass Gott nöd eifach so funktioniert, wies mir Mänsche ois wünschtet. Er isch nöd planbar. Er isch so andersch, daser nöd erchlärbar isch mit oisne Mittel. Und drum bruchts wie sone zweiti Geburt, e Geburt us Glaube.

Die zweiti Frag vom Nikodemus zeigt, dass er das nöd verstande het. Er versuecht immerno mit sim Verstand z begriffe, wer de Jesus isch. Wie chan denn en Mänsch nomal gebore wärde, wener alt isch? fragter Jesus. Und Jesus seit, dasses ebe nöd um die Geburt gat, wo sich de Nikodemus vorstellt, eini us Fleisch, sondern e Geburt us Wasser und Geischt:

Johannes 3,6 ZB 2007

Was aus dem Fleisch geboren ist, ist Fleisch, und was aus dem Geist geboren ist, ist Geist.

stat im Vers 6. Jesus redet vonere Neugeburt, wo nöd eso isch, wie mir si känned. So eini, wo es nois Baby d Wält erblickt. Nei, es isch e Geburt usem Geischt, eini wo au mit Wasser z tue het. Wasser, wo ja bide Taufi e wichtigi Rolle spillt. D Taufi isch de Inbegriff vo dere Neugeburt. Im Johannesevangelium chunt de Geist Gottes bide Taufi wie e Tuube uf Jesus. Und es stat, dass Jesus nöd mit Wasser, sondern mit Geischt tauft. Er git de Geischt wiiter, er vermittelt allne wo glaubed de Geischt.

Letst Wuche hend mir a Pfingste das Cho vo dem Geischt gfiiret. Und es isch ja irgendwie nöd ganz eifach z versta. De Nikodemus cha eim au es bitz Leid tue. Er versuecht so fescht, Jesus zversta, aber eifach ufde falsche Ebeni. Jesus versuecht ihm z hälfe: im Vers 8 stat:

Johannes 3,8 ZB 2007

Der Wind weht, wo er will, und du hörst sein Sausen, weisst aber nicht, woher er kommt und wohin er geht. So ist es mit jedem, der aus dem Geist geboren ist.

De Wind wo so schwer erchlärbar isch. Guet, hützutag chönd ois d Meterologe genau säge, woher er chunt. Aber dazumal hetme das nonöd chöne. Das Biispiil mitem Wind zeigt das Gheimnis uf, wo Jesus redet devo. Es isch unsichtbar, nöd fassbar, aber trotzdem da. Drum isch d Frag au für ois hüt Morge:

Hesch du en Glaube wo unfassbar, unerchlärbar isch, aber trotzdem da isch? Wemer sonen Glaube hend, denn lahter ois au s Unfassbare, Unerchlärbare glaube. Denn fassemer nöd nur das womer mit oisem Verstand chönd nahvollzie uf, nei denn überstiigt oise Glaube alles, was mir ois erdänke chönted. Ich glaube, dethi versuecht Jesus de Nikodemus z füere und laded ois ih, mitzcho.

En Glaube, wo nöd alles erchläre chan, de hofft uf alles, was unmöglich erschiint. So en Glaube versuecht Jesus i oisere hütige Bibelstell ufzzeige. Was traued mir Gott zue? Gat oise Glaube bis zu oisem Chopf, wo versuecht alles z erchläre, oder gater bis is Härz wo eifach glaubt und Gott alles zuetraut?

Mir sind ja inere Ziit, womer wider münd lerne z vertraue. Langsam aber stetig. De Mitmänsche, oisere Regierig, de noie Technologie wo überall installiert worde sind. Es brucht vill Vertraue und das muen zersch wider ufbaut werde. Nämemer ois doch gad au jetzt die Ziit, zum au Gott noi z vertraue. Ihm alles zueztraue und oise Verstand emal es bitz Bisiite z schiebe. Nöd uszschalte, nei emal em Härz de Vorrang zla. Gott möcht, dass mir mitere tüüfe Gwüssheit glaubed, miteme Vertraue i ihn, dass er’s richte wird. Dadezue brucht er oises Vertraue, oise Glaube.

Es brucht dadezue sone Neugeburt. E Geburt usem Geischt, damit mir Chind vo Gott dörfed si. Wenn du tauft bisch: erinnere dich doch zrug a das wo du dich no magsch erinnere. Wennd als Chind tauft worde bisch, denn chuntder vilich e Tauferinnerig in Sinn, oder suscht es Erlebnis mit Gott. Wenn du nonöd tauft bisch, denn lah dich mal uf Gott ih, zum Biispiil imene ganz eifache Gebät: Gott, zeig du dich mir, ich möcht glaube, hilf du mir. Und vilich weckt Gott in dir au de Wunsch, dich taufe zla. Denn chum doch ufe Pfarrperson zue. Vilich bruchsch du aber au eifach e Bestärchig im Glaube, e bitt, dass de Heiligi Geischt dich noi erfülle söll, demit du eso chasch glaube, wies Jesus i oisere Bibelstell zeigt het. Denn frag doch e Fründin oder en Fründ zum zäme z bäte, oder chum ufen Agstellte vode Chile zue.

Ich glaube, es isch jetzt dopplet wichtig, dasmer ois gägesitig unterstützed und ermuetiged, im Glaube dranne zbliibe, Gott z vertraue, ihm alles zuetraued. So wie es Neugeborenigs sich ganz avertraut a sine Eltere.

Amen.