PM-GD 1.11.2020

PlanG

Ich wirde nie Pfarrer. De Satz hani vo Afang ah immer gseit, wohni afange han Theologie studiere. Ich bin immer belächlet worde. So richtig hetmer das niemert wele glaube. Weni mit Fründe mal eis go zie gange bin, denn hensmi als Pfarrer agsproche: ah de Pfarrer chunt au mit! Ich han das immer chli uf die liechti Schultere gno: redet ihr nume. Aber ich hetti nie denkt, dass sie recht bhalte würed.

S Resultat gsehnder hüt da vorne. Da bini also etz. Pfarrer. Das wohni nie han wele wärde. Und trotzdem bini da und wür säge, Gott het mich da ahne gfüert. Plan G. Gottes Plan. Ich nim oi es bizli mit ufde Wäg, wo Gott mit mir gange isch, dasi schlussendlich det glandet bin, wohnis nie denkt hetti.

Alles het agfange miteme Lager in Spanie. Cambrils, la Torre del Sol. Das kenned die einte vo oi. En Campingplatz, wo mir s Konflager gmacht hend. Und ihr gönd dethi is Beach-Camp. Womer s erste Mal det ane sind, het de Jugendarbeiter no Leiter gsuecht wo mitchömed. Und so hetter mich agfröget und ich han zuegseit. Und sogar zumene Input hani no zuegseit: s Thema das vom Lager: Plan B. Ich han det en Input ghalte, dass Gott de beschde Plan für üs het, das isch de Plan B: de beschde Plan.

Nach dem Lager isch drus e Jugendarbeit entstande, wo au nachem Konf wiitergat: mir hend üs de beschde gnennt. Nöd die beschte, sondern, de beschde. Und so hani dörfe Jugendlichi uf ihrem Glaubensweg begleite und mit ihen underwägs si. Öpis wunderschöns! Später hani au e Astellig becho und bin sogar no zahlt worde defür, obwohlis au ohni Zahlig gmacht hetti, es het mir eifach scho so sehr vill gä.

Und so hani früe Froid becho am Schaffe ide Chile. Und han nebedra Theologie studiert und Musig gmacht. Das hani alles wele mitenand verbinde: Musig mit Jugendliche ide Chile. Det hami wohl gfühlt. Und Gott het das immer wider bestätiget. So hani im Studium bi Upstream chöne als Schlagzüger ispringe. Das isch die Band gsi, wohni ufegluegt han, wo Mundart Worship macht ufeme hoche Niveau. Ich han die CDs glost und super gfunde. Und hetmer nöd usgmalt, dasi eines Tages mit ihne wird Musig mache. Hüt simmer gueti Fründe und mached mitenand Musig zur Ehr vo Gott.

So het Gott Türe ufgmacht, eini nachde andere. Aber Pfarrer werde: die Tür hani ganz fescht verschlosse gha. Die hani ned mal gwagt azlange. Zu verstaubt, zu gross isch die Ufgab gsi für mich. Ich hami wohl gfühlt mitde Jugendliche und ide Musig, Pfarrer hetimer nie chöne vorstelle. Da muesch so villne Mänsche irgendwie grächt wärde, und so vill Ufgabe mitenand erledige, Taufe, Hochziit, Gottesdienst und Beerdigunge! Ich hamer das nöd chöne vorstelle.

Wasme vilich no wüsse mues: ich bin de Sohn vome Pfarrer. Und ich han nur die Generation vo Pfärrer i sim Alter kennt, und älter! Das isch au en Grund gsi, wieso ichmer de Bruef nöd han chöne vorstelle. Nachem Studium hani ghürate: mini Frau, d Alma. Mir sind es halbs Jahr ufde ganze Welt go reise. Nachde Reis han ich wele uf Dütschland go studiere. Theologie und Musig. En noie Studiegang, er het alles gha, wasi verbinde han wele. Und so hemmer ois vorbereitet für das. Und denn: zwei Wuche bevormer heicho sind, isch die Tür plötzlich zuegange. Das Studium wird nöd duregfüert, zwenig Lüt wo interessiert sind, zwenig Gäld. Ich bin vorem nüt gstande. Plan B hani nöd uf Lager gha. Ich han gmeint, es segi de Plan Gottes, Plan G. Da bruchts kein Plan B! Es het nöd söle si.

Und so hani Plan S igschlage. Ganz öpis anders. E Lehr als Schriiner. Eifach weg vode Uni, vom Studiere, öpis ganz anders. Hi zude Mänsche. Ganz eifach mitschaffe. Ich han e Schriinerlehr agfange. Ide Schriinerlehr bini miteme junge Pfarrer unterwegs gsi, immer mal wider zu ihm id Seelsorg. Eifach mis Läbe teile. Und so hani zum erschte Mal gse: Mer chan au als junge Ma Pfarrer si! Das gat au! Und me chan sogar Spass dranne ha, will de jungi Pfarrer, wo auscho über 30 gsi isch!, de het Froid gha a sim Bruef.

Und so het eine vode schwirigste Prozess i mim Läbe agfange: Gott isch mit mir ufde Wäg richtig Pfarrer si. Und ich han Schritt für Schritt entdeckt, dasi eigentlich scho fascht det bin: als Pfarrer ischmer es bitz Jugendarbeiter, wie hüt Abig, es bitz Musiker und ganz nach mitde Lüt unterwegs: wie als Schriiner. Eis Puzzleteil nachem andere het sich zämegfüegt. Und das isch ganz en usefordernde Wägabschnitt gsi, aber schlussendlich au mega schön, wili gse han: Gott het das alles brucht, alles vorbereitet. Es het sich alles zämegfüegt am Endi, mis Studium, wome brucht zum Pfarrer werde, als Jugendarbeiter gschaffet zha, ide Musig dihei zsi und als Schriiner unterwegs gsi zsi.

Das tönt etz alles so schön rosig und eifach, weni das im Rückblick verzelle. Aber im Moment dine, woni dur alles duregange bin, da hani vill Zwiifel und Sorge gha. Ich weiss bis hüt no de Gang zum Schriinermeister, wohni ihm han müsse biichte, dasi ufhöre und zrug gange go studiere. Das isch so en richtige härte Chef gsi, wo so richtig het chöne usrüefe. Er het mini Kündigung aber denn zimli gfasst higno und ich hanem aso auno e Fläsche Wii bracht.

Ich glaube de Plan G, de Plan vo Gott mit üsem Läbe isch, dass er gad die Moment wo mir zwiifled, wo mir nöd wüssed wie wiiter und s Gfühl hend, es isch alles e Sackgass, genau die Momänt brucht är, zum üs zu ihm z zie. Nöch a sis Härz. Das hani immer wider erläbt i mim Läbe. Es passt vilich nöd alles perfekt zäme, da gits Statione im Läbe, wo du nöd wiiter weisch und au nöd weisch, wied drus use chunsch. Genau i dene Statione lohnts sich, uf Gott zluege, mit ihm unterwegs zsi.

Und es hilft meistens, weme das nöd elei macht. I mim Fall hani mini Frau, d Alma und de jungi Pfarrer, de Simon zur Siite gha. Sie sind mit mir da dure gange, hend mit mir mis Läbe vor Gott bracht und ihn gfraget, wies söll wiiter ga.

Drum würi Säge de Plan G, de Plan vo Gott isch s Gebät. Plan Gebät, gad denn wen kein Plan me hesch, denn isch s Gebät vilich de Uswäg. Und öpis zweits isch de Plan G: Plan Gmeinschaft. Bis nöd elei mit dine Frage, mit dine Sorge im Läbe, wos söll higa: Frag en guete Kolleg, e gueti Kollegin, ob sie mit dir chan bäte und dis Alige vor Gott zbringe und Rat zhole. Wenn du das machsch, denn glaubi, het Gott en Plan G für dich parat: en Plan Genial!

Plan Gebät, Plan Gmeinschaft, Plan Genial.

Und im Rückblick hoffi, dasmers so chönd säge wie de Autor vom Psalm 118:

Neues Testament Psalmen: Neue Genfer Übersetzung Psalm 118

21 Ich danke dir, HERR, dass du mich erhört hast

und mir zum Helfer wurdest.

Hüt bini Pfarrer und bin froh drum. Ich liebe min Job und ich liebs, mit oi en Teil vo mim Läbenswäg därfe teilt zha.