Thoho/Theme: Mudzimu u fhata na u alusa kereke yawe nga u funzwa zwavhudi ha Ipfi lawe/God builds and grows his church by the proper preaching of His Word.

Ndima/Text: Acts 6:1-7. Text Verses: v.2, 7.

1. Mvulatswinga.

Vhahashu tshipida tshe ra vhala namusi ndi tshipida tsho pfumaho zwinzhi nga ngudo dzine ra fanela u guda sa kereke. Ndi tshine ra nga tshi shumisa u thathuvha bono lashu na vhuvha hashu sa kereke. Tshi ri humbudza-vho na uri swina, Sathane a tshi lwa na kereke ya Mune washu ha shumisi tshihali tshithihi. Tshe ra thoma u guda hei bugu ro no guda nga ha zwihali zwivhili zwe a zwi shumisa u pwasha vhutshilo ha kereke. Ro guda a tshi shumisa u tovholwa ha kereke nga vha re na maanda sa Vhotshifhe vhahulwane na Vhasadukei. Muvhi ho ngo zwi kona u pwasha kereke nga mutovholo. Kereke yo bvela phanda. Tshihali tsha vhuvhili tshandanguvhoni/corruption yo vhonalaho nga muhoyo wa vhatendi nga ngomu kerekeni. Na zwenezwi ro kona u zwi vhona uri a zwo ngo vhulaha kereke, Mudzimu o i vhulunga ya bvela phanda sa kereke ya Mudzimu. Na zwenezwi zwo vha phumudzo khulwane kha kereke ya tshifhinga tshothe, na ya tshifhinga tshashu.

Tshihali tsha vhuraru tshine ra khou guda kha hetshi tshipida tshe ra vhala namusi tshine Sathane a tshi shumisa u vhulaha vhutshilo ha kereke ndi u khakhisa/distraction. Ndi tshihali tshine muthu a tshi lavhelesa a nga vhona u nga a tshi na maanda, hone ngeno i yone cancer ine ya la muthu nga ngomu ya fhedza yo dzhia vhutshilo hawe. Ndi u khakhisa kereke kha vhudifhinduleli hayo ha u amba Ipfi la Mudzimu lwo fanelaho tshine tsha vha tshituhu tshihulu tsha Sathane. Musi kereke yo livhana na heli swina, vhutungu ha hone vha vhu vhona kha mirafho i daho. Namusi vha si na mato vha do divhona u nga kereke i khou tshimbila. Vhathu vha khou da kerekeni nga swondaha, kereke dzo dala, hone nga ngomu a huna tshithu.

Ndi heli swina line Luka a khou ri limusa lone. Rine sa kereke ro ima fhi? A ri khou thithiswa na kha u amba Ipfi la Mudzimu? Ipfi la Mudzimu li na vhuimo de vhutshiloni havho, vhutshiloni ha vhana vhavho? Vhone sa vhabebi arali vha nga tuwa fhano shangoni khathihi, vhana vhavho vha nga sala na vha kha di vha vhatendi? Tsho vha tshililo tsha kereke dza hashu dza kilasisi Gauteng tsha u imisela ntha u funzwa ha Ipfi la Mudzimu, ra prioritize vhafunzi ntha ha zwithu zwothe uri ri songo vha kereke dzi khakhiswaho kha zwe dza vhidzelwa zwone. Tshi kha di vha na tshililo tshine tsha ri talula na namusi?

2. Sathane u a tovhola kereke na nga u i khakhisa kha u vhea mato ayo kha zwihulwane zwe ya vhidzelwa zwone. Satan persecutes the church by distracting her from her calling.

Musi kereke i tshi khou tshila, vhafunziwa vha tshi khou dianda vha tshi ya phanda ho vha na u gungula kha Majuda vha ambaho Tshigerika vha tshi gungulela Majuda vha ambaho Tshiheberu. Havha vhathu vho vha vha songo fhambanywa nga luambo fhedzi, vho fhambanywa na nga matshilele avho (culture). Havha Majuda vhane vha khou vhidzwa Magerika ndi Majuda vhe vha tshila vhuthubwani kha manwe mashango, hone vha vhuya vha da vha dzula henefha Yerusalema. Majuda vha vha Vhaheberu ndi vhe vha si vhuye vha tuwa hafha Palestina. Ndi vhe vha dzula henefha tshifhinga tshothe. Vho vha vha songo tou fhambanywa nga luambo fhedzi, na nga matshilele avho. Ndi zwigwada zwivhili kha vhathu vhathihi zwe zwa dzula zwi tshi kuludzana, nndwa dza swika na kerekeni musi vho no tanganedza mafhungo madifha. Ipfi le la shumiswa u talutshedza nyito ya Majuda vha Magerika “u gungula” li dzumbulula u sa fushea nga zwine wa khou vhona kana zwine wa khou itelwa. Nga English hu a shumisiwa haya maipfi u talutshedza zwine la amba zwone: grumbling and murmuring. Ndi Ipfi lo shumisiwaho hu tshi talutshedzwa nyito ya Vhaisiraele vha tshi gungulela Mushe musi vha si na zwiliwa vhe sogani (Ekisoda 16:7) na musi vha tshi tanganedza muvhigo wa tholi dze Mushe a dzi ruma u yo tola shango le Mudzimu a vha fulufhedzisa (Numeri 14:27). Vha gungulela Mushe vha tshi ri o vha bviselani Egipita. Ndi honohu u gungula he mirado ya kereke ya Yerusalema vha ita vha tshi gungulela Vhaapostola vhe vha tanganedza masheleni a u vhavhalela vha shayaho vhukati havho (Mishumo 4:35,37). Vho gungula vha tshi ri tshilikadzi dzavho a dzi vhuyi dza humbulwa-vho musi hu tshi vhavhalelwa vhanwe. A zwi khagala uri izwi zwo vha zwi khou itea ha ni. Hone ipfi lo shumisiwaho u talutshedza zwe zwa vha zwi khou itea, neglect, overlook li amba uri ho vha hu na u sa ita zwithu u fana kha vhathu vhothe zwi tshi bva kha administration na supervision kha uyu mushumo wa u vhavhalela vha shayaho.

Hohu u gungula a yo ngo vha ndila yone ya u fhindula nzulele ine vhathu a vha khou fushea ngayo. Sa zwine ra zwi guda kha vhutshilo ha Vhaisiraele sa zwithu zwi si zwavhudi, zwe Mudzimu a zwi rwela, ndi zwine na kereke ya kaidziwa uri i songo zwi edzisa ra gungula ngauri Mudzimu u a zwi rwela (1 Vhakorinta 10:10). Kha Vhafilipi 2:14 hu pfi: Zwothe ni zwi ite ni sa gunguli ni sa nani. Hone tshithu tsha ndeme tshe hei nzulele ya disa ndi u toda u khakhisa Vhaapostola kha mushumo wa u funza Ipfi la Mudzimu vha vho fanela u vhona uri vhathu vha khou nekedzwa zwiliwa. V.2 i ri: Ndi hone vha 12 vha tshi kuvhanganya vhafunziwa vhothe vha ri, A zwo ngo fanela uri rine ri litshe u funza Ipfi la Mudzimu ri dzhene kha mafhungo a zwiliwa. Hezwi a zwi ambi na luthihi uri ndi mushumo mutuku kana wa fhasi. Ndi mushumo wa ndeme kha vhutshilo ha kereke. U vhavhalela vhatshinyali ndi vhutshilo ha kereke (Ekisoda 22:22, Doit.10:18). Ndi vhudifhinduleli ha ndeme kha vhutshilo ha kereke. Hone a si zwone zwine zwa tea u bvisa Vhaapostola kha u funza Ipfi la Mudzimu. U funzwa ha Ipfi la Mudzimu ndi wone muteo wa vhutshilo hothe ha kereke. Ndi u funzwa ha Ipfi la Mudzimu hu swikisaho thembuluwo kha vhathu, hu itaho vhathu vhenevha vho rembuluwaho uri vha vhe na mbilu ya vhathu vha shayaho vha kone u vha vhavhalela. Zwine hetshi tshipida tsha ri bvula mato khazwo ndi zwauri nzulele dzi ngaho hedzi na dzinwe nnzhi kha vhutshilo ha kereke dzi a ri hangwisa zwithu zwa ndeme zwo hwalaho vhutshilo hothe ha kereke. U funzwa zwavhudi ha Ipfi la Mudzimu ndi zwone zwi fhataho vhutshilo hashu na ha vhana vhashu, zwa ri fha fulufhelo nga ha matshelo. U vha na vhanna vha rangaho phanda mita yavho nga Ipfi la Mudzimu, u vha na vhafunzi na vharangaphanda vha rangaho phanda kereke nga u i funza zwavhudi Ipfi la Mudzimu, ndi hone vhumatshelo. Hone vhahashu ndi hafha hune Sathane a shumesa hone uri kereke i dzhiele fhasi u funzwa ha Ipfi la Mudzimu. Ndi fhethu hune na rine sa kereke ra tea u dilavhelesa hone. Ri khou vhona mini mitani yashu, na kha vhutshilo ha kereke? Ri nga nyadza ha ni u funzwa ha Ipfi la Mudzimu?

3. Mudzimu u a farisa kereke yawe u wana ndila kha zwine zwa i khakhisa kha u funzwa zwavhudi ha Ipfi lawe. God helps His church to find her way from what distract her from preaching God's Word.

Zwinwe zwine hetshi tshipida tsha ri farisa khazwo ndi tshe ra humbudzana murahu uri Mudzimu ha nga tutsheli kereke na vhukati ha maswina othe ane a da u i vhaisa na uni bvisa kha zwe ya vhidzelwa zwone. U do i lwela na u i farisa uri a didzula e na thanzi vhukati ha shango. Ndi zwone zwine ra zwi vhona kha hetshi tshipida. Thandululo ye Vhaapostola vha disa yo vha i sa ambi na luthihi u nyadza havho mushumo wa u vhavhalela vhashai vhukati havho. Vha tshi vhala v.1 na 2 hovhu vhudifhinduleli hothe vhu khou vhidzwa diakonia, ndi u shumela, a huna mushumo muhulwane na mutuku. Yothe ndi mbidzo ya Mudzimu kha vhutshilo ha kereke yawe. Vhafunziwa vho ya kha vhatendi na ndila ya u tandulula hei haedu ye ya vha i phanda ha kereke. Kha v.3 hu pfi: Zwino-ha vha hashu, dinangeleni vhanna vhatanu na vhavhili kha inwi vha divheaho uri vho dala Muya Muklhethwa, vha re na vhutali, rine ri do vha kumedza hoyo mushumo; tshashu ha do vha u fungelela nga zwa dzithabelo na u funza ri si na tshine tsha ri thithisa. Zwine wa vhona kha hoyu muhumbulo ndi u khethekanya zwe Mudzimu a vhidzela vhathu u shuma hu si u amba nga ha ndeme yazwo. Zwothe ndi zwa ndeme ngauri ndi mbidzo ya Mudzimu ya u farisa kereke yawe. Vhanwe vha vhona hafha hu hone he ha thoma ofisi ya vhushumeli (deacon), hone havha vhanna vha sumbe a huna hune vha vhidzwa Vhadikoni kha hetshi tshipida.

Hoyu muhumbulo wa vha 12 hu pfi wa takadza vhafunziwa vhothe, vha nanga vha nna vha sumbe (v.5). Musi vho vha nanga vha vha disa kha Vhaapostola vha vha rabelela, vha vha vhea zwanda (v.6). Hezwi zwo vha zwi tshi khwathisa u vha havho na maanda kha ilo sia la u vhavhalela vha shayaho. Vha na maanda khazwo e vha fhiwa nga Mudzimu. Ndi hei thandululo ye Mudzimu a disa kha vhutshilo ha kereke yawe uri i bvele phanda na u shuma. Ho ngo tenda khaedu dzi tshi bvisa kereke yawe kha zwe a i vhidzela zwone. Hu na zwithu zwa ndeme zwine na rine namusi sa kereke ra tea u guda kha vhutshilo ha hei kereke. Mudzimu o vhidza vhathu vhothe vhe a tshidza nga Yesu Kristo a vha fha mishumo yo fhambanaho ya u fhata kereke yawe na muvhuso wawe kha masia o fhambanaho a vhutshilo. A huna o vhidzwaho u sokou dzula a lavhelesa vhanwe, hone vho vhidzelwaho mushumo wa thabelo na u amba Ipfi la Mudzimu a vha faneli u khakhiswa khazwo. Vha fanela u kondelela khazwo misi yothe. Heli ndi bono lo xelaho kerekeni dza hashu hune ra vhona ministry u wa vhufunzi hei minwe mishumo a i vhonwi sa ministry, ndi kuhumbulele kwo khakheaho. Kereke i fanela u sedza tshifhinga tshothe uri avho vho vhidzelwaho u amba Ipfi la Mudzimu vha khou zwi ita ha ni. Vhatendi vha khou shumisa ha ni mpho dze Mudzimu a vha fha. Vharangaphanda vhe vha tou vhewa zwanda, vha fhiwa maanda a u ranga phanda mushumo wa vhulisa na u vhavhalela kereke vha khou zwi khunyeledza ha ni? U zwi nyadza hashu ndi u kuvhatedza u khakhisa ha Sathanenhune kereke ya sala i vhutunguni, i si tsha kona u khunyeledza zwe ya vhidzelwa zwone. Kha ri shume nga u didina na u dinekedzela zwe ra vhidzelwa zwone ndi hone ri tshi do imedzana na Sathane ra fhata kereke ya Mune washu.

Vhahashu ri tshi sedza hei nzulele vhukati hashu, ra vhona hu na u khakhiswa hu hulwane nga Muvhi, a tshi khou thithisa kereke ya Mune washu, musi ri tshi vhuelela khae, ua ri pfa a ri tshidza ra dovha ra vha zwishumiswa zwa u fhata kereke na muvhuso wawe. Kha ri diswedze vha hashu ri tende u shuma u ya nga he Mudzimu a ri kovhela ngaho.

4. Musi kereke i tshi vhea mato ayo kha zwe ya vhidzelwa zwone, Ipfi la Mudzimu li a andadzea na tshivhalo tsha vhafunziwa tsha hula. When the church focuses on her calling, the Word of God spreads and the number of disciples grow.

Musi Mudzimu o vha farisa a dzhenelela kha nzulele yavho, vha mu thetshelesa, vha shuma u ya nga he a vha laedza ngaho, ri vhudzwa nga ha mitshelo ye ya vhonala. Ipfi la Mudzimu lo andadzea, tshivhalo tsha vhafunziwa tsha engedzea. Maipfi e a shumiwa u amba mvelelo hedzi dzavhudi andadzea (spread) na u engedzea (increase) o vhewa nga ndila ya uri a zwo ngo vha zwithu zwa tshifhinga tshithihi, ndi zwe zwa tshimbila zwi tshi vhonala kha vhutshilo ha kereke tshifhinga tshothe. Haya maipfi ane a vha kha v.7 a ambaho nga ha nyaluwo ya kereke ndi maipfi e Luka a tshimbila a tshi a shumisa kha hei bugu hu na zwithu zwa ndeme zwo iteaho kha tshitori tsha vhutshilo ha kereke. Kereke yo aluwa musi Vhaapostola vha tshi kumedzela mushumo wa u funza (6:7), musi hu rembuluwa Saulo we a vha mutovholi wa kereke (9:31), musi Herod Aggripa 1 a tshi fa (12:24), nga murahu ha lwendo lwa Paulo lwa u thoma musi ho no tandululwa na thaidzo ya vhathu vhannda (16:5), na nga murahu ha lwendo lwa vhuvhili na lwa vhuraru (19:20) na musi Paulo e Roma he a funza Mafhungoi madifha a sa ofhi (28:30-31). Khahedzi ferese ndi hune ra guda uri Ipfi la Mudzimu lo andadzea, na tshivhalo tsha vhafunziwa tsha aluwa. Musi ri tshi kondelela u ita zwine Mudzimu a ri vhidzela zwone, ri do aluwa, Ipfi la swikela vhanzhi. Mudzimu ndi a tshimbilaho na vhathu vhawe, a huna muthu, kana Sathane kana dimoni li fhio na li fhio line la nga kona u ima phanda ha kereke ya Mune washu.

Uri kereke i vhe kereke a si zwithu zwinzhi zwinzhi zwine ra tea u ita. Ndi u mu fulufhela kha nzulele dzothe, na u ita zwe a ri vhidzela zwone. Kha ri ambare mapfumo a Muya sa zwine ra gudiswa kha Vhaefesa 6:6-10. Ra ambara one a huna tshine tsha do kona u ima phanda hashu sa kereke. Mune washu u khou amba navho uri vhone vha dilavhelese uri aya mapfumo vho a ambara naa? U sa aluwa hashu, u sa phadalala ha Ipfi la Mudzimu a zwi khou bva na kha rine vhe ri si ambare mapfumo a Muya. Kha ri rembuluwe vha hashu ri tende u shumiswa nga Mudzimu.

5. Mafhedziselo.

Vhahashu tshe ra gud a hei bugu, ro kona u vhona uri kereke ya Mune washuni dzula yo livhana na milingo ya mivhala minzhi. Sathane ndi ane a vha na muhumbulo tshifhinga tshothe tsha u vhaisa kereke ya Mudzimu. Hafha he ra vhala o toda u i vhulaha nga dziphambano dze dza vuwa vhukati ha kereke. Vhathu vha thoma u lwa nga zwithu zwe vha vha vha tshi nga kona u zwi dzudzanya, hone zwa toda u vha khakhisa na kha mushumo wa ndeme u fhataho vhutshilo ha kereke une u siho a huna vhutshilko ha kereke. Arali muvhi o vha o zwi kona kereke hei yo vha i tshi do fa i kha di vha lushie, hone Mudzimu a vhulunga kereke yawe. Vhaapostola vho kona u vhona zwikwekwe zwa Muvhi (Vhaefesa 6:11), vha kona u shumana nazwo zwavhudi kereke ya bvela phanda. Vhashu na namusi ri shaya vharangaphanda na mirado ya kereke vhane vha vha na spiritual discernment vhane vha kona u vhona zwine Muya a khou shuna na zwine Muvhi a khou shuma, vha kona u zwi khethekanya. Ri khou shaya u vha heyo kereke. Ri khou shaya lutendo lwa Vhaapostola namusi hune na vhukatiha nzulele dzi kondaho vha fulufhela maanda ane dzina la Yesu la vha nao, vha ditika ngao hu si nungo dzavho. ndi one maanda e othe ane a kona u kunda maanda a swiswi.

Vhahashu ndi zwone zwine Mudzimu a khou ri vhidzela khazwo. Vha a zwi tenda naa? Arali vha tshi zwi tenda zwi a konadzea u khunyeledza bono la kilasisi Gautela u tavha zwivhidzo shango lothe, zwivhuidzo zwi aluwaho kha u divha Mudzimu na kha tshivhalo. Zwi a konadzea u fhata tshikolo tsha vhufunzi sa kereke dza tshinodo Soutpansberg. Zwi a konadzea u fjatela vhana hashu zwikolo zwa tshikriste naho Sathane a khou lwa nga ndila dzothe uri zwi songo vha hone.