What IF... 上帝唔存在?

引言

唔知大家有無訂閱Disney+? 大家有無睇過宜套嘅動畫 - WHAT IF.....？ 佢大致上係講如果劇情嘅走向同原先Marvel世界嘅劇情唔同左，咁又會有一個點樣嘅結局呢？因為我最近都比較忙呀，訂閱左Disney+都只係開過宜套野出嚟睇下，都未睇曬。

唔知大家有無諗過我今日講題中嘅問題呢？WHAT IF 上帝唔存在呢？其實我一個人果時成日都會諗宜啲問題，可能因為我個人比較麻煩，又成日好批判性咁，WHAT IF 上帝唔存在宜個都係我曾經諗過嘅其中一個問題。如果上帝唔存在，咁我係神學院讀書讀得咁辛苦為乜呢？如果上帝唔存在，我宜家係度做緊啲咩呢？我同大家係度講緊嘅信息又係啲乜野係嘅呢？

或者我地今日，就嘗試用另外一個角度去理解經文。我地可能成日都會覺得聖經入面都係記載住一啲信心嘅偉人嘅事蹟，先知呀、門徒呀等等都係我地學習嘅好榜樣，但我地今日就試下用另一個角度，去睇下其實佢地都係有有血有肉嘅果一面嫁喎，佢地都會有軟弱嘅果一面嫁喎。今日嘅經文，就正正係講緊門徒係經歷完耶穌嘅受難，死亡，甚至係見證過耶穌嘅復活。但佢地可能依然係覺得好挫敗，可能都會問同一個問題：WHAT IF ......上帝唔存在 呢？WHAT IF 耶穌唔係上帝呢？

一開始就提及到，這些事以後，咁之前係發生過啲咩事呢？約翰福音20 章就係講緊耶穌復活，且向門徒顯現，又向疑惑嘅多馬展示左佢手上面嘅釘痕，向門徒證明左耶穌已經復活左。但耶穌復活左之後並無叫門徒做啲乜野。去到第二十一章，就記錄左耶穌係提比哩亞海邊，亦都即係加利利海邊向門徒再一次顯現嘅事蹟。整個廿一章，其實都隱含住門徒同耶穌生活嘅點滴。

耶穌向七個門徒顯現，當中記名嘅，其實都係處於一個尷尷尬尬嘅關係。西門彼得就係耶穌受難時三次不認主；低土馬的多馬就要摸過耶穌釘痕嘅手先肯信耶穌有復活；加利利的迦拿人拿但業，作者特登提及迦拿人拿但業，讓人聯想起係耶穌未施行第一個神蹟 - 迦拿婚宴令水變酒之前，拿但業就曾經鄙視過耶穌（約翰福音1:46），話拿撒勒還能出什麼好的麼；西庇太的兩個兒子就向耶穌要求做大粒野，俾耶穌拒絕左。

佢地係親眼睇見耶穌嘅受難，死亡，係見證過耶穌嘅復活，但係佢地嘅生命係當刻並未有改寫。如果我係佢地，我都會心諗：呀！究竟我係咪加入左個邪教組織呢？我係咪俾人呃左呢？又或者佢地係回憶緊同耶穌一齊工作嘅宜三年，或者會諗到：我點樣去定義宜三年所做嘅事呢？會唔會係我嘅黑歷史呢？或者佢地即使見到復活左嘅耶穌，佢地都會心諗：咁又點？對我嘅生命無改變，而事實上，係約翰福音嘅記載中，復活左嘅耶穌又真係無要求過佢地做啲乜野。

係佢地生命嘅一個低潮之中，係佢地咁沮喪嘅時候，佢地決定做咩呢？第三節俾左個答案我地，佢地去左打魚。佢地去左搵食，佢地選擇左重操故業，做返佢地以前做開果行，返返去以前嘅生活之中。但可惜嘅係，佢地返返去行宜條回頭路都唔成功呀，因為經文記載「那一夜並沒有打著甚麼」

但慶幸嘅係，當佢地唔主動去搵耶穌嘅時候，當佢地連定走回頭路都唔成功嘅時候，係耶穌主動搵返佢地宜班門徒。耶穌係岸邊教路，「你們把網撒在船的右邊，就會得到。」宜次唔係第一次，因為係路加福音5 章入面記載，耶穌係呼召彼得做門徒嘅過程，就係教佢打魚。當佢地網到魚嘅同時，亦認得出教路果個人就係耶穌。咁彼得就跳左落水啦，仲記唔記得我地CPR查經，彼得係水面上行走，之後跌落水，都係係加利利海。

當佢地上岸嘅時候，佢地再見到耶穌，有炭火，上面有魚和餅。當佢地仲係船上面苦惱緊無野食嘅時候，耶穌已經準備好野食俾佢地食，作為門徒根本唔需要擔心野食嘅問題，就好似佢地以往亦都曾經經歷過五餅二魚嘅神蹟一樣。但耶穌卻係叫門徒將剛才打的魚拿幾條來。其實耶穌唔係唔足夠，而係想俾佢地參與。就好似耶穌嘅傳道工作一樣，唔係耶穌需要門徒，所以呼召佢地，而係耶穌想讓佢地能夠參與。

啱啱提到有「炭火」宜個字，「炭火」其實只係出現過兩次，第一次係彼得不認耶穌果時，就係「炭火」旁邊，與人對話。

所以你或者會開始明，點解門徒中沒有一個敢問他：「你是誰？」

佢地個個都係出現左係宜份嘅「尷尬名單」之中，想走回頭路但又唔成功，仲要俾耶穌捉到正呀，人贓並獲果種，你話點會唔尷尬。但係耶穌只係對他們講：「你們來吃早飯。」

個情況就好似係你上網課俾呀媽發現左你測驗果時出貓，之後佢晚餐講左句：飲湯呀，之後就唔再講野，你都會覺得緊張，覺得出左事，覺得唔知點算好。

但係好彩個故事無停低係宜度。食完早飯之後，三次詢問約翰的兒子西門，而宜個稱號都係耶穌係呼召彼得嘅時候改嘅，但之後經文都無再提及過宜個朵，直到宜一章耶穌靈魂拷問彼得嘅時候。所以耶穌問：約翰的兒子西門，你愛我比這些更深嗎？ 係要喚起彼得跟耶穌當日嘅記憶。耶穌提及嘅「這些」，其實實際係咩，都唔太清楚。係啱啱食完嘅早飯？係打上嚟嘅魚？實際係指咩，都唔太確定，不過當有人問你宜個問題，「這些」係指啲咩已經唔再重要啦，重要嘅係你愛唔愛佢。

不過同一個問題問足你三次又真係幾大獲，如果我女朋友問我：佢今日有咩唔同左呀問三次，咁我都會覺得死期到。不過三次嘅質問，又正好對應返係炭火旁邊問：你不也是他的門徒嗎？

彼得三次回應耶穌，而耶穌就因為彼得嘅回答，而賦予佢新嘅任務，就正正係回應緊佢宜個What if 嘅問題，你同我經歷宜三年唔係你嘅黑歷史，我唔係假嫁，而係真實嘅上帝，你唔需要走返舊路，因為我賦予你一個新嘅使命：就係要去餵養我的羊，又要為我受苦。

唔知你有無問過宜個WHAT IF 上帝唔存在嘅問題呢？或者大家會係你人生嘅某一刻，通常會係你人生好挫敗嘅時候，可能係你覺得上帝無再係你考試嘅時候幫助你？可能係你俾朋友杯葛嘅時候，你覺得上帝唔陪伴你？可能係你面對你認識嘅人離世嘅時候你覺得上帝無去拯救佢？果一刻，你可能都會同我思考同一個問題，宜一個WHAT IF 上帝唔存在嘅問題。但係今日嘅經文同我地講，原來咁樣諗係無問題嫁。

當我地想當唔識上帝，想返返去以往嘅生活嘅時候，原來耶穌會親自嚟搵你，會提醒你以往你同佢之間嘅經歷，會俾新嘅任務你，以致你可以再一次同佢一齊行。或者宜個任務係繼續係教會入面成長？或者可能係學習為左主去犧牲一啲野？或者係可能開始學習要擔當一啲崗位？實際會係啲咩我唔知道，因為個個人嘅情況都可能有啲唔同，不過我可以肯定，就係宜一個目標，就係會成為你人生之中一個好重要嘅一項，亦係上帝邀請你繼續同佢一齊行，來跟從我吧。

我都好似無乜點同大家share過點解我會做左傳道人。我係因為爸爸離世所以先接觸到教會。但亦都係因為我係一個單親家庭長大，我要比其他人更加快去諗賺錢嘅問題。但當我諗想做咩嘅時候，好似上帝往往都落閘唔俾我去做咁。中五果時有諗過唔讀書出嚟做野；中七果時想做老師但公開試就失手；去到大專想做金融業搵錢，但咁啱又有個老師同你講宜行好黑暗嫁，有好多唔道德嘅操作嫁，果下因為信仰我決定畢業都唔會入宜行。但同時我都嬲左上帝，想當唔識上帝，諗下WHAT IF 上帝唔存在嘅問題，試下可唔可以俾到個理由自己去入行搵返份工。果時我信左主七年。但原來上帝又真係會親自嚟搵返你嫁喎，佢係我依然有啲咁差嘅諗法嘅時候，係一次靈修之後問我，點解你唔幫我做野呢？之後又不斷用經歷去提醒我佢有幾愛我，中間有啲省略啦，如果唔係就有排講嫁啦。不過結果就係我讀完神學之後，又有一啲嘅經歷之後就嚟到大圍堂認識到大家。宜一個WHAT IF 上帝唔存在嘅問題，就係咁樣成為我生命之中，再進一步同上帝繼續行嘅一個重要問題。

我都幾肯定今日宜篇道都唔係個個人都今日啱用，如果係嘅話，個個都係屬靈低潮，咁我地宜個群體都幾大獲。或者今日你未經歷到要去問上帝你存唔存在嘅宜個困境，不過係我地信仰歷程之中，總會有高高低低。但我想請你記得當你係低位嘅時候，你不妨問宜個問題呀：上帝你存唔存在呀？你亦都不妨嚟搵下啲導師一齊傾下，一齊去探索、一齊去見證上帝點樣親自嚟返搵你，同你繼續行落去。